வங்காளதேசத்தைச் சேர்ந்த 83 வயதுடைய கத்தோலிக்க கன்னியாஸ்திரி ஒருவர் எழுதிய புதிய ஆன்மீக நூல், இளைஞர்களிடையே நம்பிக்கை, துன்பத்தின் அர்த்தம் மற்றும் கிறிஸ்தவ சீடத்துவ வாழ்க்கை குறித்து ஆழ்ந்த சிந்தனையை ஏற்படுத்தி வருகிறது.
“Walking with Jesus” (இயேசுவுடன் நடைபோடுதல்) என்ற தலைப்பில், அப்போஸ்தலர்களின் அரசி மரியாவின் துணைவர் கழகம் (Associates of Mary, Queen of the Apostles) சார்ந்த சகோதரி மேரி புரோஷாந்தா அவர்கள் பெங்காலி மொழியில் எழுதிய இந்த நூல், மே 11ஆம் தேதி டாக்காவில் வெளியிடப்பட்டது. இந்நிகழ்வில் ஓய்வு பெற்ற துணை ஆயர் தியோட்டோனியஸ் கோம்ஸ் தலைமை விருந்தினராக கலந்து கொண்டதுடன், எழுத்தாளர்கள், வாசகர்கள் மற்றும் கத்தோலிக்க சமுதாயத்தைச் சேர்ந்த சுமார் 60 பேர் பங்கேற்றனர்.
இந்த நூல் கிறிஸ்தவ நம்பிக்கையின் மையக் கருத்துகளை எடுத்துரைக்கிறது. சிலுவையின் அர்த்தம், இயேசு கிறிஸ்துவின் பாடுகள், மரணம் மற்றும் உயிர்த்தெழுதல், தூய கன்னி மரியாளின் பங்கு, தூய ஆவியின் வழிநடத்தல் போன்ற தலைப்புகள் இதில் விரிவாக பிரதிபலிக்கப்படுகின்றன.
இன்றைய இளைஞர்கள் எதிர்கொள்ளும் சவால்களுக்கும் இந்த நூல் சிறப்பு கவனம் செலுத்துகிறது. பல மதங்கள் இணைந்து வாழும் வங்காளதேச சூழலில், பரஸ்பர மரியாதை, மதங்களுக்கிடையிலான உரையாடல் மற்றும் ஏழைகள், புறக்கணிக்கப்பட்டவர்கள் ஆகியோருடன் ஒற்றுமை காட்டும் பணியின் அவசியத்தை சகோதரி புரோஷாந்தா வலியுறுத்துகிறார். உண்மையான கிறிஸ்தவ நம்பிக்கை மனிதரை சமுதாயத்திலிருந்து விலகச் செய்வதில்லை; மாறாக அநீதிகளை எதிர்கொள்ளும் கருணையுள்ள, பொறுப்புள்ள மற்றும் துணிவான மனிதர்களாக உருவாக்குகிறது என்று அவர் குறிப்பிடுகிறார்.
டாக்கா “லிட்டில் ப்ளவர்” மறைபயிற்சி இல்லத்தின் முதல்வர் அருட்தந்தை ஜலக் ஆன்டனி டெசாய், இந்த நூலை ஆழ்ந்த ஆன்மீக வழிகாட்டியாக பாராட்டினார். “இயேசுவின் வாழ்க்கை, போதனை, துன்பம், சிலுவை மற்றும் உயிர்த்தெழுதல் வழியாக மனித விடுதலையின் பாதையைப் பின்பற்ற அழைக்கும் ஒரு ஆன்மீகப் பயணத் தோழனாக இந்த நூல் அமைகிறது,” என்று அவர் கூறினார்.
வங்காளதேச ஆயர் மாநாட்டின் கிறிஸ்தவ தொடர்பு மைய இயக்குநரும், Pratibeshi Publishing பதிப்பகத்தின் சார்பில் நூலை வெளியிட்ட அருட்தந்தை அகஸ்டின் ரிபேரோ, இந்நூலின் காலப்பொருத்தத்தை எடுத்துக்காட்டினார். வேகமாக வளர்ந்து வரும் தொழில்நுட்ப உலகமும் அதிகரிக்கும் நுகர்வுவாதமும், பல இளைஞர்களை வாழ்க்கையின் அர்த்தம் மற்றும் நோக்கத்தைத் தேடச் செய்கின்றன என்றும் அவர் கூறினார். “இத்தகைய சூழலில் ஆன்மீகம், நம்பிக்கை மற்றும் மனிதப் பொறுப்பு குறித்து சிந்திப்பது அவசியம். அந்தத் தேவைக்கு பதிலளிக்கும் உண்மையான முயற்சியே இந்த நூல்,” என்றார்.
நூல் வெளியீட்டு விழாவில் பேசிய சகோதரி புரோஷாந்தா, தனது எழுத்தின் பின்னணியை பகிர்ந்து கொண்டார். “பல ஆண்டுகளாகச் செய்த சேவைக்குப் பின், வாழ்க்கை, நன்றி மற்றும் நம்பிக்கை குறித்து ஆழ்ந்த சிந்தனையில் ஈடுபட்டேன். இன்றைய இளைஞர்கள் கடவுள், நம்பிக்கை மற்றும் வாழ்க்கை நோக்கம் குறித்து முக்கியமான கேள்விகளை எழுப்புகின்றனர். உறுதியான பதில்களை வழங்குவதற்குப் பதிலாக, ஜெபமும் அனுபவமும் வடிவமைத்த பாதைகளை நான் பகிர விரும்புகிறேன்,” என்றார்.
துணை ஆயர் கோம்ஸ், இந்த நூல் வாசகர்களை இறைவனுடன் உறவை ஆழப்படுத்தும் வழியில் வழிநடத்தும் எனக் கூறி ஆசிரியரை பாராட்டினார்.இசை மற்றும் கல்வியில் ஆர்வம் கொண்ட சகோதரி புரோஷாந்தா, இதுவரை சுமார் 60 ஆன்மீகப் பாடல்களை உருவாக்கி இரண்டு இசைத் தொகுப்புகளை வெளியிட்டுள்ளார். கல்வித் துறையில் நீண்ட கால சேவைக்குப் பிறகு ஓய்வு பெற்ற அவர், தற்போது எழுத்து, ஜெபம் மற்றும் படைப்பாற்றல் மூலம் தனது பணியைத் தொடர்ந்து வருகிறார்.
Daily Program
