கடவுளின் வார்த்தை தங்கும் தளமாக மாறுங்கள் – ஆசிய டிஜிட்டல் மறைப்பணியாளர்களிடம் ஐரிஷ் துறவி அழைப்பு
RVA News | செப்டம்பர் 11, 2026
டிஜிட்டல் மறைப்பணியாளர்கள் தங்களுடைய தனித்துவமான ஆளுமை, திறமைகள் மற்றும் வாழ்க்கை அனுபவங்கள் வழியாக கடவுள் செயல்படுவதற்கு இடமளிக்க வேண்டும். அதன் மூலம், கடவுளின் வார்த்தை மற்றவர்களைச் சென்றடையும் ஒரு “தங்கும் தளமாக” அவர்கள் மாற வேண்டும் என்று ஐரிஷ் பிரான்சிஸ்கன் துறவி ஒருவர் கூறினார்.
செப்டம்பர் 11 அன்று பிலிப்பைன்ஸின் கெசான் நகரில் நடைபெற்ற முதல் ஆசிய கத்தோலிக்க டிஜிட்டல் மறைப்பணியாளர் பேரவையில், ஆசியாவின் பல்வேறு நாடுகளைச் சேர்ந்த 100-க்கும் மேற்பட்ட கத்தோலிக்க டிஜிட்டல் தொடர்பாளர்கள் மற்றும் மறைப்பணியாளர்களிடம் அருட்தந்தை கொலும்பா ஜோர்டன், CFR உரையாற்றினார்.
“தன்னிலிருந்து உண்மையான சாட்சியம் நோக்கி” என்ற தலைப்பில் நடைபெற்ற அவரது அமர்வு, தன்னை முன்னிலைப்படுத்தும் முயற்சி மற்றும் வெளிப்படையாகத் தோன்றுவதற்கான அச்சம் ஆகியவற்றைக் கடந்து, உயிருள்ள கிறிஸ்துவைச் சுட்டிக்காட்டும் உண்மையான சாட்சிகளாக டிஜிட்டல் மறைப்பணியாளர்கள் மாறுவது குறித்து எடுத்துரைத்தது.
FABC-யின் சமூகத் தொடர்பு அலுவலகம் (FABC-OSC) மற்றும் Radio Veritas Asia (RVA) இணைந்து, வத்திக்கான் தகவல் தொடர்பு துறையின் Fully Present Network அமைப்புடன் இணைந்து இந்த நான்கு நாள் பேரவையை ஏற்பாடு செய்துள்ளன. “செல்வாக்காளர்களிடமிருந்து சாட்சிகளாக: ஆசியாவில் டிஜிட்டல் மறைப்பணிக்கான ஒன்றிணைந்த பாதை” என்ற கருப்பொருளில் செப்டம்பர் 10 முதல் 13 வரை இப்பேரவை நடைபெறுகிறது.
அயர்லாந்தின் லிமெரிக்கில் பணியாற்றும் அருட்தந்தை கொலும்பா ஜோர்டன், Little by Little என்ற காணொளி பாட்காஸ்ட் மற்றும் டிஜிட்டல் நற்செய்திப் பணி, நம்பிக்கை உருவாக்கம் ஆகியவற்றில் தனது பணிக்காக அறியப்படுகிறார்.
டிஜிட்டல் உள்ளடக்கங்களை உருவாக்கத் தொடங்கிய ஆரம்ப காலத்தை நினைவுகூர்ந்த அவர், தன்னைப் பற்றிய பெருமை மற்றும் தனது பணியைத் தன்னை மையமாகக் கொண்டதாக மாற்றும் சோதனை குறித்து பேசினார். இதனை திருமுழுக்கு யோவானின் வார்த்தைகளுடன் அவர் தொடர்புபடுத்தினார்:
“அவர் உயர வேண்டும்; நான் தாழ வேண்டும்.”
அதே நேரத்தில், தன்னிலுள்ள ஆணவத்தைப் பற்றி அதிகமாக அஞ்சுவதால், கடவுள் அளித்துள்ள திறமைகளை மறைத்துவிடக் கூடாது என்றும் அவர் எச்சரித்தார்.
“உங்களிடம் அந்தத் திறமை இருந்தால், உங்களுக்கு முன் ஒரு கேமராவை வைத்தவுடன் நீங்கள் உயிரோட்டமாக மாறுகிறீர்கள். அது அரிதான ஒரு வரம்,” என்று அவர் கூறினார்.
தனது ஆளுமையை அழித்துவிடுவது தீர்வல்ல; மாறாக, அந்த ஆளுமையின் வழியாக கடவுள் செயல்படுவதற்கு இடமளிக்க வேண்டும் என்று அவர் வலியுறுத்தினார்.
கிறிஸ்தவ தொடர்பாளரை கடவுளின் வார்த்தை உலகைச் சென்றடையும் ஒரு “தங்கும் தளமாக” அவர் வர்ணித்தார். கன்னி மரியாவைச் சுட்டிக்காட்டிய அவர், இயேசுவின் மனித அவதாரத்தில் மரியாவின் மனித இயல்பின் வழியாகவே கடவுள் செயல்படத் தேர்ந்தெடுத்தார் என்று கூறினார்.
அதேபோல், ஒவ்வொரு மறைப்பணியாளரும் தங்களுடைய தனித்துவமான அனுபவங்கள், திறமைகள் மற்றும் ஆளுமையின் வழியாக நற்செய்தியை மற்றவர்களிடம் கொண்டு செல்ல முடியும்.
“நற்செய்தி எப்போதும் ஒருவரின் வழியாகவே பேசுகிறது,” என்று அவர் கூறினார்.
உண்மையான சாட்சியம் என்பது மற்றவர்களிடம் என்ன சொல்ல வேண்டும் என்று முதலில் கேட்பதில் தொடங்குவதில்லை. மாறாக, நற்செய்தி தங்களுடைய சொந்த வாழ்க்கையை எவ்வாறு மாற்றுகிறது என்பதை அனுமதிப்பதில் தொடங்குகிறது என்று அவர் விளக்கினார்.
ஒரு காலத்தில் தனது மறையுரைகள், மற்றவர்கள் எதை மாற்றிக்கொள்ள வேண்டும் என்பதைச் சொல்வதில் அதிகம் கவனம் செலுத்தியதாக அருட்தந்தை ஜோர்டன் நினைவுகூர்ந்தார். அப்போது ஒரு சகோதரர் அவரிடம், “கடவுளே, நான் அவர்களிடம் என்ன சொல்ல வேண்டும்?” என்று கேட்பதற்குப் பதிலாக, “கடவுளே, நீர் என்னிடம் என்ன சொல்கிறீர்?” என்று கேட்குமாறு அறிவுறுத்தினார்.
இந்த மாற்றம், மற்றவர்களுக்கு வெறுமனே அறிவுரை வழங்குவதற்குப் பதிலாக, தனது சொந்த இறை அனுபவத்திலிருந்து பேச அவருக்கு உதவியது.
டிஜிட்டல் மறைப்பணியாளர்களும் தங்கள் உள்ளடக்கங்களை உருவாக்குவதற்கு முன் இதே கேள்வியை எழுப்ப வேண்டும் என்று அவர் கேட்டுக்கொண்டார்:
“இது என்னை எவ்வாறு மாற்றியுள்ளது? நற்செய்தி உண்மையில் என் வாழ்க்கையில் உருவெடுத்துள்ளதா?”
இளைஞர்களுடன் தொடர்புகொள்ளும்போது, தங்களுடைய பலவீனங்கள், தோல்விகள் மற்றும் நம்பிக்கை அனுபவங்கள் உள்ளிட்ட உண்மையான வாழ்க்கை அனுபவங்களைப் பகிர்வது அவசியம் என்றும் அவர் கூறினார். ஏனெனில் ஒருவர் தங்களிடம் வெறுமனே பேசுகிறாரா அல்லது உண்மையான அனுபவத்திலிருந்து பேசுகிறாரா என்பதை இளைஞர்கள் விரைவாக உணர்ந்துகொள்வார்கள்.
திருத்தந்தை இரண்டாம் ஜான் பால் அவர்களின் “உடலின் இறையியல்” போதனையை மேற்கோள் காட்டிய அவர், மனிதன் தன்னை மற்றவர்களுக்கு ஒரு “கொடையாக வழங்கும் அழைப்பு” கொண்டவர் என்று விளக்கினார். எனவே, டிஜிட்டல் மறைப்பணியாளர்கள் வெறுமனே உள்ளடக்கங்களை உருவாக்குபவர்களாக இல்லாமல், தங்களையே ஒரு கொடையாக வழங்கி, அதன் வழியாக மற்றவர்கள் கிறிஸ்துவைச் சந்திக்க உதவ வேண்டும் என்றார்.
நற்செய்தி ஒரு குறிப்பிட்ட மனிதக் குரலின் வழியாக எவ்வாறு அறிவிக்கப்படுகிறது என்பதற்கு நற்செய்தியாளர் லூக்காவையும் அவர் எடுத்துக்காட்டாகக் கூறினார். லூக்கா தனக்குக் கிடைத்த இறை அனுபவங்களையும் மரபில் வழங்கப்பட்டவற்றையும் தனது சொந்த பார்வை மற்றும் புரிதலின் வழியாகப் பதிவு செய்தார். அதே நேரத்தில், அவரது பணியில் தூய ஆவியின் செயல்பாட்டை திருச்சபை ஏற்றுக்கொள்கிறது.
அதேபோல், டிஜிட்டல் மறைப்பணியாளர்கள் இயேசு கடந்த காலத்தில் செய்தவற்றை மட்டும் பகிராமல், இன்றும் கிறிஸ்து தங்கள் வாழ்க்கையில் உயிரோடு இருந்து செயல்படுகிறார் என்பதை தங்கள் அனுபவத்தின் வழியாக வெளிப்படுத்த வேண்டும்.
“இயேசு இன்றும் உயிரோடு இருக்கிறார். இன்று மீண்டும் அவரை நாம் சந்திக்கிறோம். அந்த அனுபவத்திலிருந்து நாம் சாட்சியம் அளிக்கும்போது, அது உயிரோட்டமுள்ளதாக இருக்கும்,” என்று அருட்தந்தை ஜோர்டன் கூறினார்.
திருவிவிலியத்தில் தங்களை உண்மையாகத் தொடும், சவால் விடுக்கும் அல்லது ஆச்சரியப்படுத்தும் பகுதிகளை கவனிக்குமாறு அவர் பங்கேற்பாளர்களை ஊக்குவித்தார். இத்தகைய தருணங்கள் தங்கள் வாழ்க்கையில் கடவுள் செயல்படும் இடங்களை வெளிப்படுத்துவதோடு, டிஜிட்டல் சாட்சியத்திற்கான உண்மையான உள்ளடக்கங்களாகவும் அமையலாம் என்றார்.
புனித லிசியுவின் தெரசாவைப் பற்றி காணொளி ஒன்றைப் பதிவு செய்தபோது, தான் உணர்ச்சிவசப்பட்டதாகவும், அந்தத் தருணத்தை காணொளியில் இருந்து நீக்காமல் வைத்ததாகவும் அருட்தந்தை ஜோர்டன் பகிர்ந்துகொண்டார். அந்தக் காணொளி தனது வெற்றிகரமான பதிவுகளில் ஒன்றாக மாறியது.
தான் பகிர்ந்துகொள்ளும் செய்தியால் ஒரு தொடர்பாளர் உண்மையாகத் தொடப்பட்டிருக்கும்போது, அதற்கு மக்கள் ஆழமாகப் பதிலளிக்கிறார்கள் என்பதை இந்த அனுபவம் தனக்கு உணர்த்தியதாக அவர் கூறினார்.
தன்னையே மையப்படுத்துதல் மற்றும் அச்சத்திலிருந்து, கடவுளின் பிரசன்னத்தை உணர்ந்து, தனிப்பட்ட இறை அனுபவத்தைப் பெற்று, இறுதியில் உண்மையான ச
Daily Program
