புலம்பெயர்ந்தோரை மனித வர்த்தகத்திலிருந்து பாதுகாக்க அழைப்பு
வறுமை, வேலைவாய்ப்பின்மை மற்றும் பொருளாதார நெருக்கடிகள் காரணமாக புலம்பெயர்ந்தோர் உள்ளிட்ட நலிவுற்ற நிலையில் உள்ளவர்கள் மனிதக் கடத்தல்காரர்களின் இலக்குகளாக மாறக்கூடும் என்று இந்தோனேசியாவின் பாங்கல்பினாங் மறைமாவட்ட ஆயர் அட்ரியானுஸ் சுனார்கோ, OFM, அவர்கள் எச்சரித்துள்ளார். செப்டம்பர் 20ஆம் தேதி, இந்தோனேசியாவின் படாம் நகரில் நடைபெற்ற 2026ஆம் ஆண்டின் உலக புலம்பெயர்ந்தோர் மற்றும் அகதிகள் நாளுக்கான அனைத்துலக கருத்தரங்கின் நிறைவையொட்டி நடைபெற்ற திருப்பலியில் ஆயர் சுனார்கோ அவர்கள் இவ்வாறு உரையாற்றினார். “நலிவிலிருந்து மாண்பை நோக்கி: பாதுகாப்பான மற்றும் ஒழுங்குமுறையான புலம்பெயர்வை ஊக்குவித்தல்” என்ற தலைப்பில் இக்கருத்தரங்கு நடைபெற்றது.
பல்வேறு நேரங்களில் திராட்சைத் தோட்டத்திற்கு பணியாளர்கள் அழைக்கப்பட்ட நற்செய்திப் பகுதியைச் சுட்டிக்காட்டிய ஆயர், வேலைவாய்ப்பைத் தேடிப் போராடும் மக்களுக்கு வாய்ப்புகளை உருவாக்குவதன் முக்கியத்துவத்தை எடுத்துரைத்தார். “மாலை ஐந்து மணியிலும் வேலைவாய்ப்பின்றி ஒருவர் இருந்தார்; அவருக்கும் ‘எனது திராட்சைத் தோட்டத்திற்குச் செல்லுங்கள்’ என்று வேலை வழங்கப்பட்டது” என்று அவர் கூறினார். இத்தகைய வாய்ப்புகள் இல்லாதபோது, வறுமையில் சிக்கித் தவிக்கும் நலிவுற்ற மக்களை மனிதக் கடத்தல்காரர்கள் தங்கள் சுரண்டலுக்கு இலக்காக்கிக் கொள்வார்கள் என்றும் அவர் தெரிவித்தார்.
தாமதமாக வந்தவர்களுக்கும் வேலை வழங்கிய திராட்சைத் தோட்ட உரிமையாளரின் தாராள மனப்பான்மை, மனித மாண்பைப் பாதுகாப்பதற்கான பாடத்தை வழங்குகிறது என்று ஆயர் சுனார்கோ அவர்கள் கூறினார். புலம்பெயர்ந்தோருக்கு இரக்கத்துடன் உதவுவதில் மட்டுமே கத்தோலிக்கர்கள் தங்களது பணியை மட்டுப்படுத்தக் கூடாது என்றும், அவர்கள் கண்ணியத்துடன் வாழ்வதற்கும், வாழ்வாதாரத்தைப் பெறுவதற்கும் வாய்ப்புகளை உருவாக்குவது அவசியம் என்றும் அவர் வலியுறுத்தினார்.
மேலும், புலம்பெயர்ந்தோருடன் துணைநிற்பதில் தன்னார்வலர்களின் பங்களிப்பையும் அவர் எடுத்துரைத்தார். துன்பங்களையும் சிரமங்களையும் எதிர்கொள்ளும் மக்களுடன் மகிழ்ச்சியுடன் உடனிருப்பதே தன்னார்வப் பணியின் அடிப்படை என்று அவர் கூறினார். பிலிப்பியருக்கு எழுதிய திருமுகத்தில் புனித பவுல் கிறிஸ்துவுடன் இருக்க விரும்பினாலும், சமூகத்தின் நலனுக்காகத் தம்முடைய உடனிருப்பு தேவைப்படுவதால் தொடர்ந்து மக்களுடன் இருக்கத் தயாராக இருந்ததை ஆயர் சுட்டிக்காட்டினார். புலம்பெயர்ந்தோரின் மறைக்கப்பட்ட துயரங்களுக்கு துணைநிற்பதில் இத்தகைய மனப்பான்மை முக்கியமானது என்றும் அவர் கூறினார்.
இயற்கைப் பேரிடர்களின்போது சமய வேறுபாடுகளைக் கடந்து ஒருவருக்கொருவர் உதவும் இந்தோனேசிய மக்களின் பரஸ்பர உதவி மரபையும் அவர் குறிப்பிட்டார். இதே ஒற்றுமை உணர்வு புலம்பெயர்ந்தோர் மற்றும் நலிவுற்ற நிலையில் வாழும் அனைவரிடமும் வெளிப்பட வேண்டும் என்றும் அவர் அழைப்பு விடுத்தார். “அன்றாட வாழ்வின் எளிய செயல்களில் கூட தன்னார்வலர்களாக மாறுவதற்கான வாய்ப்பையும் துணிவையும் நாம் பெறுவோம் என்று நம்புகிறேன்” என்று ஆயர் தெரிவித்தார்.
புலம்பெயர்ந்தோரை உதவி தேவைப்படும் மக்களாக மட்டும் பார்க்காமல், மாண்பு, நம்பிக்கை மற்றும் திறமைகளைக் கொண்ட மனிதர்களாகக் கருதி, அவர்கள் பாதுகாப்புடன் வாழ்வதற்கான வாய்ப்புகளை உருவாக்க வேண்டும் என்றும் அவர் வலியுறுத்தினார். புலம்பெயர்வு தொடர்பான பதில் வெறும் இரக்கத்தில் முடிந்துவிடக் கூடாது; நலிவுற்ற மக்களுடன் துணைநிற்பதும், அவர்களுக்கு வாய்ப்புகளை உருவாக்குவதும், அவர்கள் சுரண்டலுக்கு உள்ளாகும் முன்பே அவர்களுடன் நிற்பதும் அவசியம் என்று ஆயர் சுனார்கோ அவர்கள் தெரிவித்தார்.
Daily Program
