இத்தாலி முழுவதிலும் இருந்து வந்த மேயர்களை சந்தித்த திருத்தந்தை பதினான்காம் லியோ அவரகள் , சூதாட்டம் மற்றும் தனிமை போன்ற பிரச்சினைகளை எதிர்கொள்வதற்காக “மனிதநேயமான உண்மையான உறவுகளை” ஊக்குவிக்க வேண்டும் என்று அவர்களை கேட்டுக்கொண்டார்.
“மக்கள்தொகை நெருக்கடி”, குடும்பங்களும் இளைஞர்களும் எதிர்கொள்ளும் “போராட்டங்கள்”, முதியவர்களிடையே அதிகரிக்கும் சமூக தனிமை, ஏழைகளின் “மௌனக் கூச்சல்”, சுற்றுச்சூழல் மாசுபாடு மற்றும் “சமூக மோதல்கள்” ஆகியவை இத்தாலியின் நகரங்களும் ஊர்களும் எதிர்கொள்ளும் மிகப்பெரிய சவால்கள் என போப் லியோ திங்கள்கிழமை தெரிவித்தார்.
டிசம்பர் 29 அன்று வத்திக்கானில் நடைபெற்ற Assocazione Nazionale dei Comuni Italiani (இத்தாலிய உள்ளாட்சி அமைப்புகளின் தேசிய சங்கம்) சார்ந்த மேயர்களுடனான சந்திப்பில் அவர் இதை கூறினார்.
இந்த பிரச்சினைகளை சமாளிப்பதற்கு முதலில் பலவீனர்களின் மற்றும் ஏழைகளின் குரலைக் கேட்பது அவசியம் என்று போப் லியோ வலியுறுத்தினார். இல்லையெனில், “ஜனநாயகம் சுருங்கி, வெறும் பெயராகவும், ஒரு மரபுச் சடங்காகவும் மாறிவிடும்” என்று அவர் கூறினார்.
சூதாட்டம் அதிகரிப்பு பின்னர் போப் லியோ, “பல குடும்பங்களை அழித்துவிட்ட சூதாட்டம் என்ற பேராபத்தை குறிப்பாக கவனத்திற்கு கொண்டுவர விரும்புகிறேன்” என்று தெரிவித்தார்.
“சமீப ஆண்டுகளில் இத்தாலியில் சூதாட்டம் பெரிதும் அதிகரித்துள்ளது என்பதை புள்ளிவிவரங்கள் காட்டுகின்றன” என்று அவர் கூறினார். கல்வி, மனநலம் மற்றும் சமூக நம்பிக்கை ஆகியவற்றுக்கு சூதாட்டம் “கடுமையான பிரச்சினை” என விவரிக்கும் சமீபத்திய காரிட்டாஸ் அறிக்கையையும் அவர் சுட்டிக்காட்டினார்.
இந்த பிரச்சினையை “தனிமையின் ஒரு வடிவம்” என விவரித்த திருத்தந்தை , குடிமக்களுக்கிடையில் “உண்மையான மனிதநேய உறவுகளை” வளர்த்தெடுப்பதன் மூலம் இதை எதிர்கொள்ள பொதுத் துறை அதிகாரிகளை அழைத்தார்.
20-ஆம் நூற்றாண்டைச் சேர்ந்த இத்தாலிய கத்தோலிக்க குருவும் சமூக செயற்பாட்டாளருமான டான் பிரிமோ மஸோலாரியை மேற்கோள் காட்டிய போப், இத்தாலிக்கு “கழிவுநீர் வடிகால்கள், வீடுகள், சாலைகள், நீர்க்கால்வாய்கள், நடைபாதைகள் மட்டும் போதாது; உணர்வின் ஒரு முறை, வாழும் ஒரு முறை, ஒருவரை ஒருவர் பார்க்கும் ஒரு பார்வை, சகோதரர்களாகவும் சகோதரிகளாகவும் ஒன்றாக கூடும் ஒரு வழியும் தேவை” என்று வலியுறுத்தினார்.
கிறிஸ்துமஸ் மற்றும் ‘உண்மையான அதிகாரம்’
தன் உரையில், முந்தைய நாளில் கொண்டாடப்பட்ட புனித நிர்பாவிதர்கள் திருநாளையும் போப் லியோ நினைவுகூர்ந்தார். அந்த நாளில், குழந்தை இயேசுவை கொல்லும் முயற்சியில் மன்னர் ஹேரோதேஸ் படுகொலை செய்த இளம் குழந்தைகளை திருச்சபை நினைவு கூர்கிறது.
இந்த படுகொலை “மனிதநேயமற்ற அதிகாரத்தின்” வெளிப்பாடு என்று போப் கூறினார். அது “மனித உயிரின் மரியாதையை புறக்கணிப்பதால், அன்பின் அழகை அறியாது” என்றார்.
இதற்கு மாறாக, இயேசுவின் பிறப்பு “அதிகாரத்தின் மிக உண்மையான தன்மையை வெளிப்படுத்துகிறது; அது முதன்மையாக பொறுப்பும் சேவையும் ஆகும்” என்று திருத்தந்தை விளக்கினார்.
Daily Program
