கோபுரத்தின் கட்டிடக் கலைஞர்களாக அல்ல, ஒற்றுமையை உருவாக்குபவர்களாக திருஅவை இருக்க வேண்டும் - கர்தினால் டேவிட் | FABC | Veritas Tamil

ஆசிய ஆயர் பேரவைகளின் கூட்டமைப்பு (FABC) தனது 12வது நிறைவிறுதிப் பேரவை  ஜகார்த்தாவில் தயாராகி வரும் நிலையில், FABC-யின் துணைத் தலைவரான கர்தினால் பாப்லோ விர்ஜிலியோ டேவிட், திருத்தந்தை லியோ XIV அவர்களின் ஆசிய திருஅவைகளுக்கான அழைப்பை எதிரொலிக்கும் வகையில், திருஅவை “பாபேல் கோபுரத்தின் கட்டிடக் கலைஞர்களாக அல்ல, ஒற்றுமையை உருவாக்குபவர்களாக” மாற வேண்டும் என்று வலியுறுத்தினார்.

நிறைவிறுதிப் பேரவைக்கு முன்னதாக வெளியிடப்பட்ட தனது சிந்தனைப் பகிர்வில், திருத்தந்தையின் செய்தியையும், பொதுப்பேரவைக்கான திருத்தந்தையின் சிறப்புத் தூதராக கர்தினால் ஓஸ்வால்ட் கிராசியாஸ் நியமிக்கப்பட்டதையும் அவர் மகிழ்ச்சியுடன் வரவேற்றார். பொதுப்பேரவையின் மையக் கருத்தான “ஒன்றிணைந்த திருஅவை  மாற்றம்” (Synodal Conversion) குறித்து FABC-யின் ஒன்றிணைந்த பயண (Synodality) குழு மேற்கொண்ட சிந்தனைகளுடன் திருத்தந்தையின் செய்தி ஆழமாக இருப்பதாக அவர் கூறினார்.

அந்தக் குழு, ஒன்றிணைந்த பயணத்தின் அடையாளங்களாக நற்செய்தியில் வரும் இரு நபர்களை ஆராய்ந்ததாக கர்தினால் டேவிட் நினைவுகூர்ந்தார். ஒருவர், “கீழே இறங்கி வா” என்று இயேசு அழைத்த சக்கேயு; மற்றொருவர், கிறிஸ்துவைச் சந்தித்த பின் “இதைவிடப் பெரியவற்றைக் காண்பாய்” என்ற வாக்குறுதியைப் பெற்ற நத்தனியேல். இறுதியில் மத்திய குழு நத்தனியேலை பொதுப்பேரவையின் வழிகாட்டும் முன்மாதிரியாகத் தேர்ந்தெடுத்தாலும், இந்த இருவரும் மாற்றத்தின் ஒரே ஆன்மிகப் பயணத்தின் இரு நிலைகளை பிரதிநிதித்துவப்படுத்துகின்றனர் என்று அவர் விளக்கினார்.

“சக்கேயு என்பது இறங்கிவருதலைக் குறிக்கிறார்; அதாவது அகந்தை, சலுகை, தன்னம்பிக்கை ஆகிய மரங்களிலிருந்து கீழிறங்குவதைச் சுட்டிக்காட்டுகிறார். நத்தனியேல் என்பது உயர்வைக் குறிக்கிறார்; கிறிஸ்துவுடனான தனிப்பட்ட சந்திப்பின் மூலம் ‘பெரியவற்றைக் காண’ நம் கண்கள் திறக்கப்படுவதை வெளிப்படுத்துகிறார்,” என்று கர்தினால் டேவிட் கூறினார்.

திருத்தந்தை முன்வைத்த “பாபேலைப் போலப் பிரிவினையை உருவாக்காமல், ஒற்றுமையை உருவாக்குங்கள்” என்ற அழைப்பு, இந்த ஒன்றிணைந்த மாற்றப் பயணத்தை வேறு விதமாக வெளிப்படுத்துவதாகவும் அவர் குறிப்பிட்டார். ஒவ்வொரு முடிவிலும் இறைவனை முன்னிலைப்படுத்தி, மனிதரை மையமாக வைத்து, இன்றைய உலகின் சவால்களையும் உண்மைகளையும் அச்சமின்றி எதிர்கொள்வதற்கே திருச்சபை அழைக்கப்படுவதாக அவர் கூறினார்.

ஆசியாவின் செழுமையான பண்பாட்டு, மொழி, மதப் பன்முகத்தன்மையை நினைவுகூர்ந்த கர்தினால் டேவிட், உலகளாவிய திருஅவைக்கு ஆசியா வழங்க வேண்டிய தனித்துவமான பங்களிப்பு உள்ளது என்றார். ஒரே மாதிரியான தன்மையைத் திணிப்பதற்குப் பதிலாக, உரையாடல், சந்திப்பு மற்றும் பரஸ்பர மரியாதை வழியாக ஒற்றுமைக்கு சாட்சியாக ஆசிய திருஅவைகள் விளங்க வேண்டும் என்று அவர் வலியுறுத்தினார்.

மேலும், கடவுளுக்கும் மனிதகுலத்திற்கும் இடையிலான உண்மையான பாலம் கிறிஸ்துவே என்றும், உண்மையான ஒன்றிணைந்த மாற்றம் என்பது மக்கள், பண்பாடுகள், மதங்கள், ஏழைகள் மற்றும் படைப்புலகம் முழுவதுடனும் பாலங்களை அமைக்கும் கிறிஸ்துவின் வழியில் நம்மை ஈடுபடுத்திக் கொள்வதே என்றும் அவர் விளக்கினார்.

இறுதியாக, நத்தனியேலின் “இதைவிடப் பெரியவற்றைக் காண்பாய்” என்று நத்தனியேளுக்கு இயேசு கூறியது போல, இந்த FABC நிறைவிறுதிப் பேரவை உதவ வேண்டும் என்றும், “ஒற்றுமை, பங்கேற்பு மற்றும் பணி” என்ற நோக்கில் ஆயர்களும் இறைமக்களும் தொடர்ந்து ஒன்றாகப் பயணிக்க வேண்டும் என்றும், இந்தப் பேரவையை தூய ஆவியின் வழிநடத்தலுக்கு ஒப்படைத்து தனது நம்பிக்கையை கர்தினால் டேவிட் வெளிப்படுத்தினார்.