திருஅவையின் பொது சாட்சியத்தைப் பாதுகாக்க பிரான்ஸ் ஆயர்களிடம் திருத்தந்தை லியோ XIV அழைப்பு | Veritas Tamil

செப்டம்பர் 27 அன்று பிரான்சின் லூர்து அன்னை திருத்தலத்தில் பிரான்ஸ் ஆயர்களைச் சந்தித்த திருத்தந்தை லியோ XIV, பொதுவாழ்வில் கத்தோலிக்கத் திருஅவைக்கு தீர்க்கதரிசனப் பங்கு இருப்பதாகக் கூறினார். மேலும், பொதுவெளியில் நற்செய்தியை அறிவிக்கவும், கல்வி வழங்கவும், இறைவழிபாட்டை நடத்தவும் திருஅவைக்கு உள்ள சுதந்திரத்தைப் பாதுகாக்குமாறு ஆயர்களை அவர் கேட்டுக்கொண்டார்.

செப்டம்பர் 25 முதல் 28 வரை நடைபெறும் தனது பிரான்ஸ் திருத்தூதுப் பயணத்தின் ஒரு பகுதியாக, செப்டம்பர் 27, ஞாயிற்றுக்கிழமை லூர்து அன்னை திருத்தலத்தில் பிரான்ஸ் ஆயர்களைத் திருத்தந்தை சந்தித்தார். தங்கள் நாட்டின் கிறிஸ்தவ மரபை மீண்டும் கண்டறிய மக்களுக்கு உதவுவதோடு, துணிவுடனும் மறைப்பணியாற்றும் மனப்பான்மையுடனும் செயல்படுமாறு அவர் ஆயர்களை ஊக்குவித்தார்.

“பொதுவெளியில் திருஅவையின் குரல் கேட்கப்படுவதற்கு முழு உரிமையும் உள்ளது” என்றும், அதன் இயல்பிலேயே அது “தீர்க்கதரிசன அதிகாரத்தைக்” கொண்டுள்ளது என்றும் திருத்தந்தை கூறினார்.

“அது எப்போதும் புரிந்துகொள்ளப்படாவிட்டாலும், அதன் குரல் இன்றியமையாததாகவே உள்ளது” என்று அவர் தெரிவித்தார்.

பிரான்சின் தனித்துவமான மதச்சார்பின்மை முறையான laïcité குறித்தும் திருத்தந்தை குறிப்பிட்டார். காலப்போக்கில் உருவாக்கப்பட்ட சமநிலை தற்போது படிப்படியாக கேள்விக்குள்ளாக்கப்பட்டு வருவதாக அவர் கூறினார்.

நற்செய்தியை அறிவிக்கவும், உண்மையான சுதந்திரம் குறித்து மக்களுக்குக் கல்வி அளிக்கவும், பொதுவெளியில் இறைவழிபாட்டை நடத்தவும் திருஅவைக்கு உள்ள சுதந்திரத்தையும் உரிமைகளையும் பாதுகாப்பதில் விழிப்புடன் இருக்குமாறு அவர் ஆயர்களை வலியுறுத்தினார். இதன் மூலம் கிறிஸ்தவ அன்பை சமூகத்தில் வெளிப்படையாக வெளிப்படுத்த முடியும் என்றும் அவர் கூறினார்.

பிரான்ஸ் கத்தோலிக்கர்களின் நம்பிக்கையை ஆழப்படுத்தவும், நாட்டின் சவால்களை துணிவுடனும் மறைப்பணிக்கான படைப்பாற்றலுடனும் அணுகவும் ஆயர்களை திருத்தந்தை ஊக்குவித்தார்.

அதேவேளை, திருஅவையின் குறைபாடுகளை நேர்மையாக ஏற்றுக்கொள்ள வேண்டும் என்றும் அவர் அழைப்பு விடுத்தார்.

“உண்மையின் மீதான அன்புடனும், நல்ல ஆயனின் அன்பால் காயங்களைக் கட்டுப்போடும் உறுதியுடனும் குறைபாடுகளை ஒப்புக்கொள்ள எப்போதும் துணிவு கொண்டிருங்கள்” என்று அவர் கூறினார்.

திருஅவை சார்ந்த சூழல்களில் குருக்கள் மற்றும் பிறரால் சிறார்களுக்கு எதிராக இடம்பெற்ற பாலியல் துஷ்பிரயோகங்களைத் தடுப்பதற்கும் அவற்றைக் கையாள்வதற்கும் பிரான்ஸ் ஆயர்கள் மேற்கொண்ட நடவடிக்கைகளுக்கு திருத்தந்தை சிறப்பாக நன்றி தெரிவித்தார். இந்த முயற்சிகளை மிகுந்த விழிப்புணர்வுடன் தொடர்ந்து மேற்கொள்ளுமாறும், அதேவேளை குருக்களின் மறைப்பணிக்கு ஆதரவளிக்குமாறும் அவர் கேட்டுக்கொண்டார்.

கத்தோலிக்கக் கல்வியையும் திருத்தந்தை முக்கியமான மறைப்பணித் தளமாகக் குறிப்பிட்டார். பள்ளிகள் அனைவரையும் வரவேற்க வேண்டும் என்றும், அதேநேரத்தில் கிறிஸ்துவைச் சந்திப்பதற்கான வாய்ப்புகளை வழங்க வேண்டும் என்றும் அவர் கூறினார்.

பிரான்சில், குறிப்பாக தியான வாழ்வுக்கான அர்ப்பணிப்பில், துறவற அழைத்தல்கள் குறைந்து வருவது குறித்தும், வரலாற்றுச் சிறப்புமிக்க துறவு இல்லங்கள் மூடப்படுவது குறித்தும் திருத்தந்தை கவலை தெரிவித்தார்.

கத்தோலிக்கக் குடும்பங்களுக்கு ஆதரவளிக்கவும், இளைஞர்கள் தங்கள் வாழ்வை கிறிஸ்துவுக்கு அர்ப்பணிப்பதற்கான வாய்ப்பைக் கண்டறிய உதவவும் ஆயர்களை அவர் கேட்டுக்கொண்டார்.

“நம்பிக்கையைப் புதுப்பித்து, பிரான்சில் திருஅவையின் மறைப்பணிக்கு புதிய உத்வேகத்தை அளிக்க, ஒரே ஒரு ‘வழிகாட்டுதலே’ உள்ளது... இயேசு கிறிஸ்துவை உண்மையாகவும் ஆர்வத்துடனும் மீண்டும் மீண்டும் அறியச் செய்து, அன்புகூரச் செய்வதே அது” என்று திருத்தந்தை கூறினார்.

திருஅவைக்குள் கருத்தியல் அடிப்படையிலான பிளவுகளைத் தவிர்த்து, ஒற்றுமையுடன் இருக்குமாறும் பிரான்ஸ் ஆயர்களை திருத்தந்தை கேட்டுக்கொண்டார்.

கத்தோலிக்க ஒற்றுமை என்பது “ஒரே மாதிரியான சமச்சீரான நிலை” அல்ல என்றும், உண்மையான கத்தோலிக்க நம்பிக்கையின் அடிப்படையில் பல்வேறு உண்மையான கத்தோலிக்க அணுகுமுறைகள் ஒன்றிணைவதற்கு இடமளிக்கும் ஒற்றுமை என்றும் அவர் விளக்கினார்.

இந்த ஒற்றுமையை உரையாடலுடனும், அண்மைக் காலங்களில் திருஅவை ஆழப்படுத்தி வரும் திருஅவை ஒன்றிணைந்து பயணிக்கும் பாணியான “Synodal” அணுகுமுறையுடனும் அவர் இணைத்துப் பேசினார்.

செப்டம்பர் 27 அன்று லூர்தில் நடைபெற்ற திருத்தந்தையின் நிகழ்ச்சிகளில் இந்த ஆயர்கள் சந்திப்பும் இடம்பெற்றது. இதனுடன் திருத்தலத்தில் திருப்பலி, நோயாளிகள் மற்றும் அவர்களைப் பராமரிக்கும் பணியாளர்களுடனான சந்திப்பு, தியான வாழ்வில் ஈடுபட்டுள்ள அருட்சகோதரிகளுடனான சந்திப்பு, மாலை நேர ஜெபமாலை மற்றும் மெழுகுவர்த்தி பவனி ஆகிய நிகழ்வுகளும் நடைபெற்றன.