இன்று நான் உயிருடன் இருக்கிறேன் என்றால், அதற்குக் காரணம் நீங்கள் மட்டுமே” என்ற வார்த்தைகளை மும்பை உயர் மறைமாவட்டத்தின் ஸ்நேஹாலயா குடும்ப சேவை மையத்தின் முன்னாள் இயக்குநர் அருள்தந்தை கயேத்தான் மெனெசஸ் நினைவுகூர்ந்தார். ஆகஸ்ட் 8ஆம் தேதி ஸ்நேஹாலயா தனது 50 ஆண்டுகால சேவையின் பொன்விழாவைக் கொண்டாடியபோது, இந்தச் சாட்சி அதன் மனிதநேயப் பணியின் ஆழமான தாக்கத்தை வெளிப்படுத்தியது.
தனது கணவர் வேறொரு பெண்ணுடன் தொடர்பில் இருப்பதை அறிந்த ஒரு கர்ப்பிணிப் பெண், மனமுடைந்து தற்கொலை செய்துகொள்ளும் நோக்கில் வீட்டை விட்டு வெளியேறிய சம்பவத்தை அருள்தந்தை மெனெசஸ் நினைவுகூர்ந்தார். செல்லும் வழியில், ஒருவர் ஸ்நேஹாலயா குறித்து அவரிடம் எடுத்துரைத்து, உதவி பெறுமாறு ஊக்குவித்தார். பின்னர் அருள்தந்தை மெனெசஸை சந்தித்த அந்தப் பெண், தனது நெருக்கடியான சூழலில் அவருடைய வழிகாட்டுதலையும் துணையையும் பெற்றார்.
பல ஆண்டுகளுக்குப் பின்னர் அவரை மீண்டும் சந்தித்தபோது, அந்தப் பெண், “இன்று நான் உயிருடன் இருக்கிறேன் என்றால், அதற்குக் காரணம் நீங்கள் மட்டுமே” என்று கூறினார்.
இந்தச் சாட்சி, கடந்த 50 ஆண்டுகளாக ஸ்நேஹாலயா முன்னெடுத்து வரும் பணியின் நோக்கத்தை எடுத்துக்காட்டுகிறது. குடும்பங்கள், தம்பதியர் மற்றும் தனிநபர்கள் தங்கள் பிரச்சினைகளைப் பகிர்ந்து கொள்ளவும், அவர்களுக்குச் செவிசாய்த்து, உடனிருந்து வழிநடத்தவும், மீண்டும் நம்பிக்கையைக் கண்டறிய உதவவும் இம்மையம் பணியாற்றி வருகிறது.
50 ஆண்டுகால குடும்பப் பணி
1976ஆம் ஆண்டு ஆகஸ்ட் 8ஆம் நாள் தொடங்கப்பட்ட ஸ்நேஹாலயா, மும்பையில் குடும்பங்களைப் பாதித்து வந்த பல்வேறு சவால்களுக்கு, குறிப்பாக தொழில்முறை ஆலோசனை மற்றும் ஆன்மீக வழிகாட்டுதலுக்கான தேவைக்கு பதிலளிக்கும் வகையில் உருவானது.
இரண்டாம் வத்திக்கான் பொதுச்சங்கத்தின் போதனைகளாலும், திருத்தந்தை ஆறாம் பவுலின் Humanae Vitae திருமடலாலும் ஈர்க்கப்பட்ட இம்மையம், திருமணத் தயாரிப்பு, குடும்ப ஆலோசனை, இயற்கை குடும்பக் கட்டுப்பாட்டு முறைகள், உளவியல் ஆதரவு மற்றும் உருவாக்கப் பணிகள் உள்ளிட்ட பல்வேறு சேவைகளை படிப்படியாக விரிவுபடுத்தியது.
பொன்விழா நிகழ்வில், தற்போதைய இயக்குநர் அருள்தந்தை ஆஷ்வின் காஸ்டெல்லினோ, ஸ்நேஹாலயாவின் பணியை வளர்த்தெடுத்த முன்னாள் இயக்குநர்களின் பங்களிப்புகளை நினைவுகூர்ந்தார். பல ஆண்டுகளாக, இம்மையம் தனது சேவைகளை விரிவுபடுத்தியதுடன், பங்குத்தள அடிப்படையிலான குடும்பப் பணிகளையும் வலுப்படுத்தியுள்ளது.
ஸ்நேஹாலயாவின் நிறுவன இயக்குநர் அருள்தந்தை டாசன் அம்போஸ்டா காணொளி வழியாக வழங்கிய செய்தியில், குடும்ப நெருக்கடிகளை எதிர்கொள்ளும் தம்பதியர் மற்றும் தனிநபர்களுக்கு தொழில்முறை மற்றும் முழுமையான மேய்ப்புப்பணி ஆதரவு வழங்க மும்பை உயர் மறைமாவட்டம் மேற்கொண்ட முயற்சிகளை நினைவுகூர்ந்தார்.
எதிர்காலத்தை நோக்கிய புதிய முயற்சிகள்
“இதயத்துடன் செவிமடுத்தல், அன்புடன் உடனிருத்தல், நம்பிக்கையில் இணைந்து பயணித்தல்” என்ற கருப்பொருளில் பொன்விழா கொண்டாடப்பட்டது.
திருமணத் தயாரிப்பை ஒரு முறை வழங்கப்படும் திட்டமாக மட்டுமல்லாமல், திருமண வாழ்வின் மகிழ்ச்சிகளிலும் சவால்களிலும் தம்பதியருடன் தொடர்ந்து பயணிக்கும் பணியாக மாற்றும் நோக்கில் புதிய முயற்சிகள் அறிமுகப்படுத்தப்பட்டன.
இதன் ஒரு பகுதியாக, 100 வழிகாட்டும் தம்பதியரைப் பயிற்றுவித்தல், புதிதாகத் திருமணமான 500 தம்பதியருடன் இணைந்து பயணித்தல், மற்றும் வேறுபட்ட சமயங்களைச் சேர்ந்த 100 தம்பதியருக்கு சிறப்பான ஆதரவு வழங்குதல் ஆகிய திட்டங்கள் முன்னெடுக்கப்பட உள்ளன.
மேலும், உயர் மறைமாவட்டம் முழுவதும் வழிகாட்டும் தம்பதியர் வலையமைப்புகளை உருவாக்குவதுடன், வேறுபட்ட சமயங்களைச் சேர்ந்த தம்பதியருக்கு உதவுவதற்கான பல்சமய திருமண வழிகாட்டி கையேடு” ஒன்றையும் வெளியிடத் திட்டமிடப்பட்டுள்ளது.
மும்பை பேராயர் ஜான் ரோட்ரிக்ஸ் அவர்கள், 50ஆம் ஆண்டு பொன்விழா என்பது கணவன்–மனைவிக்கு இடையிலான தூய்மையானதும் விலைமதிப்பற்றதுமான அன்பைக் கொண்டாடும் நிகழ்வு என்று கூறினார்.
“தங்கம் என்பது தூய்மையானதும் மிகவும் விலைமதிப்பற்றதுமான ஒன்றின் அடையாளம். கணவன்–மனைவிக்கு இடையிலான தூய்மையான அன்பும் நம்மை இறை அன்பை அனுபவிக்க அழைக்கிறது” என்று அவர் தெரிவித்தார்.
தொழில்நுட்பம், செயற்கை நுண்ணறிவு, நகர்ப்புறத் தனிமை உள்ளிட்ட புதிய சமூகச் சூழல்கள் குடும்பங்களுக்கும் திருஅவைக்கும் புதிய சவால்களை ஏற்படுத்தி வருவதாக பேராயர் சுட்டிக்காட்டினார். குறிப்பாக இளைய தலைமுறையினருக்கு செவிசாய்த்து, அவர்களிடமிருந்தும் கற்றுக்கொள்ள திருஅவை திறந்த மனதுடன் இருக்க வேண்டும் என்று அவர் கேட்டுக்கொண்டார்.
ஸ்நேஹாலயா தனது அடுத்தகட்டப் பயணத்தைத் தொடங்கும் நிலையில், திருமணத் தயாரிப்பைத் தாண்டி, திருமண வாழ்வின் முழுப் பயணத்திலும் தம்பதியருடன் தொடர்ந்து உடனிருந்து வழிகாட்டும் பணியை முன்னெடுக்க உள்ளது.
இறுதியாக, பேராயர் ரோட்ரிக்ஸ், ஸ்நேஹாலயாவின் பணியை தொடர்ந்து முன்னெடுக்க ஊக்குவித்து, “இறைவன் செய்த அனைத்திற்காகவும் அவருக்கு நன்றி செலுத்துங்கள்; இந்த ஒளி தொடர்ந்து பிரகாசிக்கட்டும்” என்று வாழ்த்தினார்.
Daily Program
