திருமுழுக்குப் பெற்ற கிறிஸ்தவர்களே முதன்மையானவர்கள்: கர்தினால் மரியோ கிரெச் | FABC | Veritas Tamil

ஆயர்கள், குருக்கள், கர்தினால்கள் அல்லது பொதுநிலையினர் தலைவர்கள் இருப்பதற்கு முன்பாக, திருமுழுக்குப் பெற்ற கிறிஸ்தவர்கள் இருக்கிறார்கள்.

ஜூலை 24 அன்று ஜகார்த்தாவில் இடம்பெற்ற ஆசிய ஆயர் பேரவைகளின் கூட்டமைப்பின் (FABC) 12-ஆவது நிறைவிறுதி பேரவையில் பங்கேற்றவர்களிடம் உரையாற்றியபோது, கர்தினால் மரியோ கிரெச் தனது சிந்தனையை இந்தக் கருத்திலிருந்தே தொடங்கினார். “திருஅவையின் மறைமாவட்ட அளவிலான நடைமுறைச் செயல்பாடுகளுக்கான பாதைகள்” என்ற தலைப்பில் அவர் வழங்கிய உரையில், பதவி அல்லது அந்தஸ்து அல்ல, திருமுழுக்கே திருஅவையின் அடையாளத்திற்கும் அதன் பணிக்கும் அடித்தளமாகும் என்பதை ஆயர் மாமன்றத்தின் பொதுச் செயலர் திருஅவைத் தலைவர்களுக்கு நினைவூட்டினார்.

ஆசியா முழுவதிலுமிருந்து ஆயர்கள் ஒன்றுகூடி, திருஅவையின் ஒன்றிணைந்த பயணத்தை கண்டம் முழுவதிலும் உள்ள உள்ளூர் திருஅவைகளில் எவ்வாறு வேரூன்ற முடியும் என்பதைச் சிந்தித்து வரும் ஹோட்டல் முலியாவின் வாண்டா அறையில் அவரது உரை நடைபெற்றது.

கர்தினால் கிரெச் அறிமுகப்படுத்தப்பட்டபோது, அவருடைய திருஅவைப் பதவிகள் மற்றும் பட்டங்களின் நீண்ட பட்டியலைக் கேட்டுக்கொண்டிருந்த அவர், மென்மையாக இடைமறித்தார்.

“நீங்கள் ஒரு முக்கியமான விஷயத்தைச் சொல்ல மறந்துவிட்டீர்கள்,” என்று புன்னகையுடன் கூறினார். “நாம் திருமுழுக்குப் பெற்றவர்கள் என்பதைச் சொல்ல மறந்துவிட்டீர்கள்.”

அவரது இந்தக் கருத்து கூட்டத்தில் அன்பான சிரிப்பை ஏற்படுத்தியது. அதேவேளையில், அவரது உரையின் மையத்தையும் அது வெளிப்படுத்தியது.

“நாம் இங்கே இருப்பதற்குக் காரணம் நாம் திருமுழுக்குப் பெற்றவர்கள் என்பதுதான். நமது வாழ்வின் அடித்தளக் கல் திருமுழுக்கு,” என்று அவர் தொடர்ந்து கூறினார்.

கர்தினால் கிரெச் அவர்களின் பார்வையில், ஒன்றிணைந்த திருஅவைக்கான மாமன்றத்தின் செயல்பாட்டை கட்டமைப்புகள் அல்லது உத்திகளிலிருந்து தொடங்காமல், திருஅவையின் முதன்மையான அடையாளத்தை மீண்டும் கண்டறிவதிலிருந்து தொடங்க வேண்டும். அதாவது, திருமுழுக்கின் வழியாக ஒன்றிணைக்கப்பட்ட இறைமக்கள் என்ற அடையாளத்தை மீட்டெடுப்பதே முதன்மையானதாகும்.

திருமுழுக்குப் பெற்ற அனைவருக்கும் பொதுவாக வழங்கப்பட்டுள்ள சமமான மாண்பை திருஅவை ஏற்றுக்கொள்ளும்போதுதான் ஒன்றிணைந்த பயணம் சிறப்பாக வளர முடியும் என்று கர்தினால் கிரெச் கூறினார்.

ஒவ்வொரு அழைத்தலும் திருமுழுக்கிலிருந்தே உருவாகிறது என்று அவர் விளக்கினார். ஆயர்கள், குருக்கள், துறவியர் மற்றும் பொதுநிலையினர் வெவ்வேறு பணிகளை மேற்கொண்டாலும், கிறிஸ்துவின் பணியில் பங்கேற்கும் ஒரே திருமுழுக்குப் பெற்ற அழைப்பை அனைவரும் பகிர்ந்துகொள்கிறார்கள்.

“அனைவரின் பங்கேற்பும் வெறுமனே உள்ளடக்கமாக மட்டும் இருக்கக்கூடாது; முதலில் அது செயல்முறையாக மாற வேண்டும்,” என்று அவர் கூறினார்.

இதன் காரணமாகவே, உலகளாவிய திருஅவை மாமன்றத்தின் பயணம் உரோமில் தொடங்காமல், உலகெங்கிலும் உள்ள மறைமாவட்டங்களில் தொடங்கப்பட்டது என்பதை அவர் சுட்டிக்காட்டினார். உலகளாவிய அளவில் கலந்துரையாடல்கள் நடைபெறுவதற்கு முன்பாக, ஆயர்கள் குருக்கள், துறவியர் மற்றும் பொதுநிலையினரின் குரல்களைக் கேட்க அழைக்கப்பட்டனர்.

ஒவ்வொரு கிறிஸ்தவருக்கும் திருமுழுக்கின் மூலம் வழங்கப்படும் மாண்பை வலியுறுத்திய அதேவேளையில், ஒன்றிணைந்த பயணம் ஆயர்களின் பணியைப் பலவீனப்படுத்துகிறது என்ற கருத்தை கர்தினால் கிரெச் நிராகரித்தார். மாறாக, ஒன்றிணைந்த பயணம் ஆயர்களின் தலைமைத்துவத்தை அவர்கள் பணியாற்றும் சமூகத்தின் வாழ்வோடு இணைப்பதன் மூலம் அதை மேலும் வலுப்படுத்துகிறது என்று அவர் விளக்கினார்.

“ஆயர் இல்லாமல் திருஅவை இல்லை. ஆனால் மந்தை இல்லாமல் ஆயரும் இல்லை,” என்று அவர் கூறினார்.

ஆயரின் பணி தனித்து முடிவெடுப்பதன் மூலம் நிறைவேறுவதில்லை. மாறாக, தமது பொறுப்பில் ஒப்படைக்கப்பட்டுள்ள இறைமக்களுடன் இணைந்து, இறைவனின் திருவுளத்தைத் தெளிந்து அறிவதன் வழியாகவே அது நிறைவு பெறுகிறது என்று அவர் விளக்கினார். ஆயரின் அதிகாரத்தைக் குறைப்பதற்குப் பதிலாக, ஒன்றிணைந்த பயணம், ஒன்றிப்பில் இணைந்து பயணிக்கும் உள்ளூர் திருஅவையின் மேய்ப்பராக ஆயரின் முக்கியப் பணியைத் தெளிவுபடுத்துகிறது.

ஆசியத் திருஅவைகளுக்கு இந்தப் பார்வை குறிப்பாக முக்கியத்துவம் வாய்ந்தது என்றும் கர்தினால் கிரெச் கூறினார். ஆசியாவின் பல உள்ளூர் திருஅவைகள் தங்கள் சமூகங்களில் சிறுபான்மையினராக வாழ்கின்றன. அவர்களின் வலிமை எண்ணிக்கையிலோ சமூகச் செல்வாக்கிலோ இல்லை; மாறாக, தங்கள் அன்றாட வாழ்வின் மூலம் நற்செய்திக்குச் சாட்சியாக இருக்கும் திருமுழுக்குப் பெற்ற இறைநம்பிக்கையாளர்களின் உண்மைத்தன்மையில்தான் உள்ளது என்று அவர் குறிப்பிட்டார்.

திருமுழுக்கிற்கு அவர் அளித்த முக்கியத்துவம், FABC நிறைவிறுதிக் கூட்டத்தின் மையக் கருத்துகளில் ஒன்றையும் எதிரொலிக்கிறது. ஆசியாவின் பல்வேறு கலாச்சாரங்கள் மற்றும் சமயங்களுக்கிடையே பாலங்களை அமைக்கும் பணியில் ஈடுபட்டு, உள்ளூர் திருஅவைகள் எவ்வாறு அதிக மறைப்பணி உணர்வுடனும், ஒன்றிப்பயணத் தன்மையுடனும் செயல்பட முடியும் என்பதை இந்தப் பொதுக்கூட்டம் ஆராய்ந்து வருகிறது.