2025 டிசம்பர் 14 அன்று, இந்தியாவின் மணிப்பூர் மாநிலத்தில், ரோங்மை கத்தோலிக்க சமூகத்திற்கான முதல் முழுமையான ரோங்மை கத்தோலிக்க திருவிவிலியம் அதிகாரப்பூர்வமாக வெளியிடப்பட்டது. புனித திருவிவிலியம் முழு 73 நூல்களையும் கொண்ட இந்த வெளியீடு, ரோங்மை கத்தோலிக்க திருச்சபையின் வரலாற்றில் ஒரு முக்கியமான மைல்கல்லாக அமைந்துள்ளது.
ரோங்மை என்பது, முக்கியமாக மணிப்பூர், நாகாலாந்து மற்றும் அசாம் மாநிலங்களில் வாழும் ரோங்மை நாகா மக்களால் பேசப்படும் நாகா மொழிகளில் ஒன்றாகும்.
இந்த சிறப்புமிக்க திருப்பலி கொண்டாட்டம் தெங்கோஞ்சாங்–கௌபும் பகுதியில் அமைந்துள்ள குடும்ப நம்பிக்கை தியான மையத்தில் (Family of Faith Retreat Centre) நடைபெற்றது. இந்நிகழ்வின்போது, இம்பால் மறைமாவட்டத்தின் ஓய்வு பெற்ற பேராயர் டொமினிக் லூமோன் அவர்கள், ரோங்மை கத்தோலிக்க வேதாகமத்தை அதிகாரப்பூர்வமாக வெளியிட்டு திறந்து வைத்தார்.
திருப்பலியில் அருட்தந்தையர்கள் மைக்கேல் ஹிங்க்பா (SDB), டிங்லுங் பிரான்சிஸ் (SDB), கே.சி. ஜேம்ஸ் (SDB), ஹிலாரி கமேய், மாரியஸ் காங்மை, நிக்கோலஸ் கமேய், லான்சி டி’கோஸ்டா (SJ) உள்ளிட்ட பலர் இணைந்து திருப்பலி நிறைவேற்றினர். இந்த வரலாற்றுச் சிறப்புமிக்க தருணத்தை காணவும் கொண்டாடவும் ஆயிரக்கணக்கான விசுவாசிகள் திரண்டிருந்தனர்.
ஆன்மீகத் தயாரிப்பின் ஒரு பகுதியாக, முந்தைய மாலை ஓய்வு பெற்ற பேராயர் டொமினிக் லூமோன் அவர்களின் தலைமையில் ஒரு மிகச் சிறப்பான திருப்பலி ஊர்வலம் நடைபெற்றது. அதனைத் தொடர்ந்து, சகோதரர் டைசின்லுங் அவர்களின் வழிநடத்துதலின் கீழ், குடும்ப நம்பிக்கை குழுவால் ஒரு தியான நிகழ்ச்சி நடத்தப்பட்டது. ஊர்வலத்தின் போது, வெளியிடப்படவிருந்த வேதாகமம், திருயூகரிஸ்திய ஆண்டவருடன் சேர்த்து எடுத்துச் செல்லப்பட்டது. இது, இறைவார்த்தைக்கும் திருயூகரிஸ்திக்கும் உள்ள பிரிக்க முடியாத உறவை சின்னமாக வெளிப்படுத்தியது.
திருப்பலியின் தொடக்க ஊர்வலத்தின் போது, ஒரு பண்பாட்டு குழு, புதிதாக வெளியிடப்பட்ட திருவிவிலியம் மரியாதையுடன் பலிபீடத்திற்குக் கொண்டு வந்தது. இது, ரோங்மை மக்களின் ஆழ்ந்த நம்பிக்கையையும் செழுமையான பண்பாட்டு பாரம்பரியத்தையும் பிரதிபலித்தது. அதனைத் தொடர்ந்து, அதிகாரப்பூர்வ வெளியீட்டிற்கு முன், வேதாகமம் அரியணையில் அமர்த்தப்பட்டது.
தமது உபதேசத்தில், பேராயர் லூமோன் அவர்கள், இப்போது ரோங்மை கத்தோலிக்க சமூகம் தங்களது சொந்த மொழியில் முழுமையான வேதாகமத்தைப் பெற்றிருப்பதாக வலியுறுத்தினார். “மனிதன் அப்பத்தினால் மட்டுமல்ல, கடவுளின் வாயிலிருந்து வரும் ஒவ்வொரு வார்த்தையாலும் வாழ்கிறான்” என்ற நற்செய்தி வசனத்தை நினைவூட்டி, விசுவாசிகள் இறைவார்த்தையை நேசித்து, வாசித்து, வாழ வேண்டும் என்று அவர் ஊக்குவித்தார்.
விழா பாராட்டு நிகழ்ச்சியில் உரையாற்றிய பேராயர், புனித ஜெரோம் அவர்களின் வார்த்தைகளை மேற்கோள் காட்டி,
“திருவிவிலியத்தை அறியாமை என்பது கிறிஸ்துவை அறியாமையே” என்றார். மேலும், புனித வேதாகமத்திற்கு உரிய மரியாதை செலுத்த வேண்டும் என்றும், அதன் மேல் எதையும் வைக்கக் கூடாது என்றும் அவர் அறிவுறுத்தினார். இந்த வரலாற்றுச் சிறப்பை நினைவுகூரும் வகையில், டிசம்பர் 14ஆம் தேதி ‘வேதாகம நாள்’ ஆகக் கடைபிடிக்கப்பட வேண்டும் என்றும் அவர் அறிவித்தார்.
இந்த நிகழ்ச்சியில், பல திருச்சபை தலைவர்கள் மற்றும் பொதுநிலை பிரதிநிதிகள் கலந்து கொண்டனர். அவர்களில் ரோங்மை கத்தோலிக்க வேதாகம மொழிபெயர்ப்பு குழுவின் தலைவர் டாக்டர் மேத்யூ சி. கமேய், பொதுச் செயலாளர் சர் ஜான் டாங்மை, ரோங்மை கத்தோலிக்க டிம்புவாம் (RCD–AMN) தலைவர் திரு. டேவிட் கோன்மெய், RCD மற்றும் RCD (நாகாலாந்து) அமைப்புகளைச் சேர்ந்த திரு. டேவிட் ஜியாங்அம்லுங் கமேய், ரோங்மை மறைக்கல்வியாளர்கள் சங்கத் தலைவர் ஓஜா சைமன் டாங்மை, ரோங்மை கத்தோலிக்க மகளிர் சங்க (RCWS) உறுப்பினர்கள் மற்றும் பல பொதுநிலை விசுவாசிகள் அடங்குவர்.
திருவிவிலியம் மொழிபெயர்ப்பாளர்கள் அனைவரும் பாராட்டப்பட்டனர். குறிப்பாக, ரோங்மை கத்தோலிக்க வேதாகமத்தின் மொழிபெயர்ப்பு, அச்சிடல் மற்றும் விநியோகத்தின் முதன்மை ஒருங்கிணைப்பாளராக பணியாற்றிய அருட்தந்தை நிங்மை தாமஸ் அவர்களுக்கு சிறப்பு பாராட்டு வழங்கப்பட்டது.
இந்த வரலாற்றுச் சிறப்புமிக்க கொண்டாட்டம், சகோதரர் டைசின்லுங் அன்செல்ம் அவர்களின் ஆன்மீக வழிநடத்துதலிலும், மடாம் ரீட்டா கமேய், மடாம் மார்த்தா, மறைக்கல்வியாளர் ஸ்டீபன் மற்றும் அவர்களின் அர்ப்பணிப்பான குழுவினரின் சேவையுடனும், குடும்ப நம்பிக்கை குழு அன்புடன் தயாரித்த சகோதரத்துவ அகவ உணவுடன் (Agape Meal) நிறைவடைந்தது.
Daily Program
