மேற்கு இந்தியாவின் மும்பையில், ஆகஸ்ட் 20 அன்று பல்வேறு சமயங்களைச் சேர்ந்த தலைவர்கள் சிறப்புத் திரைப்படக் காட்சியில் ஒன்றுகூடி, மத நல்லிணக்கம், அமைதி மற்றும் ஒற்றுமையை வலியுறுத்தும் Batwara 1947 திரைப்படத்தின் செய்தியைப் பகிர்ந்துகொண்டனர்.
1947ஆம் ஆண்டு பிரித்தானிய இந்தியாவின் பிரிவினையைப் பின்னணியாகக் கொண்டு உருவாக்கப்பட்டுள்ள இத்திரைப்படம், இந்தியாவும் பாகிஸ்தானும் தனித்தனி நாடுகளாகப் பிரிக்கப்பட்டபோது ஏற்பட்ட பெருமளவிலான மக்கள் இடம்பெயர்வு மற்றும் மத வன்முறைகளை மையமாகக் கொண்டுள்ளது.
திரைப்பட இயக்குநர் ராஜ்குமார் சந்தோஷி ஏற்பாடு செய்த இச்சிறப்புக் காட்சி, மும்பை சாந்தா குரூஸில் உள்ள First Look திரையரங்கில் நடைபெற்றது. இந்து, கிறிஸ்தவ, சீக்கிய, முஸ்லிம் மற்றும் புத்த சமயங்களைச் சேர்ந்த பிரதிநிதிகள் இதில் பங்கேற்றனர். மத மற்றும் சமூக வேறுபாடுகளைக் கடந்து அமைதியான நல்லிணக்கத்தை வளர்ப்பதற்கான உரையாடல் மற்றும் சிந்தனைக்கான தளமாகத் திரைப்படத்தைப் பயன்படுத்துவதே இந்நிகழ்வின் நோக்கமாக அமைந்தது.
முஃப்தி ஜியாயி ஹஸ்ரத், கோஸ்வாமி சுஷில் ஜி மகராஜ், விவேக் முனி, தேவேந்திர மணி, பரம்ஜித் சிங் சந்தோக், பூர்ண பந்தே மற்றும் இந்திய ஆயர் பேரவையின் (CBCI) சார்பில் அருள்பணி நோர்பர்ட் ஹெர்மன், SVD உள்ளிட்டோர் பங்கேற்றனர்.
மத மற்றும் சமூகப் பிளவுகளைக் கடந்து செல்லும் சக்திகளாக அன்பும் மனிதநேயமும் விளங்குவதைத் திரைப்படம் எடுத்துக்காட்டுவதாக பங்கேற்பாளர்கள் பாராட்டினர். குறிப்பாக, இந்தியாவின் இளம் தலைமுறையினருக்கு பரஸ்பர மரியாதை மற்றும் அமைதியான நல்லிணக்கத்தின் செய்தி மிகவும் பொருத்தமானது என்றும் அவர்கள் தெரிவித்தனர்.
திரைப்படக் காட்சிக்குப் பின்னர் மும்பை டி.என். நகர் பகுதியில் உள்ள The Club-ல் நடைபெற்ற செய்தியாளர் சந்திப்பில், சமயத் தலைவர்கள் திரைப்படம் குறித்த தங்கள் கருத்துகளைப் பகிர்ந்துகொண்டனர்.
Batwara 1947 திரைப்படத்தில் சன்னி தியோல், பிரீத்தி ஜிந்தா மற்றும் ஷபானா ஆஸ்மி ஆகியோர் நடித்துள்ளனர். இசையை ஏ.ஆர். ரஹ்மானும், பாடல்வரிகளை ஜாவேத் அக்தரும் வழங்கியுள்ளனர். அமீர் கான் இத்திரைப்படத்தின் தயாரிப்பாளராக உள்ளார்.
இந்த நிகழ்வு ஒரு திரைப்படக் காட்சியைத் தாண்டி, அமைதி, அன்பு, மனித மாண்பு மற்றும் தேசிய ஒற்றுமை போன்ற பொதுவான மதிப்புகளை பல்வேறு சமயங்களைச் சேர்ந்த தலைவர்கள் ஒன்றிணைந்து உறுதிப்படுத்தும் வாய்ப்பாக அமைந்தது.
வேறுபாடுகள் பிளவுக்குக் காரணமாகாமல், உரையாடலுக்கான வாய்ப்பாக மாறும் வகையில், குறிப்பாக இளைஞர்களிடையே மத நல்லிணக்கத்தையும் பரஸ்பர புரிந்துணர்வையும் வலுப்படுத்த வேண்டும் என்ற ஒருமித்த அழைப்புடன் நிகழ்வு நிறைவடைந்தது.
Daily Program
