ஏழைகள் மற்றும் விளிம்புநிலை மக்களுக்காக இறைவாக்குரைக்கும் திருஅவையாக ஆசியத் திருஅவை திகழ வேண்டும்: மிசெரியோர் தலைவர் | Veritas Tamil

ஏழைகள், புலம்பெயர்ந்தோர் மற்றும் பருவநிலை மாற்றத்தால் அதிகம் பாதிக்கப்படுவோருக்காக இறைவாக்குரைக்கும் திருஅவையாக ஆசியத் திருஅவை விளங்க வேண்டும் என்று, ஜெர்மன் கத்தோலிக்க ஆயர்களின் வளர்ச்சிக்கான அமைப்பான மிசெரியோர் (Misereor) நிறுவனத்தின் தலைமை இயக்குநர் அருள்பணி முனைவர் ஆண்ட்ரியாஸ் ஃப்ரிக் அவர்கள், ஆசிய ஆயர் பேரவைகளின் கூட்டமைப்பின் (FABC) 12ஆவது பேரவையில் வலியுறுத்தினார்.

ஜூலை 23 அன்று இந்தோனேசியாவின் ஜகார்த்தாவில் நடைபெற்ற பேரவையில் ஆயர்கள், அருள்பணியாளர்கள், துறவியர் மற்றும் திருஅவைத் தலைவர்களிடம் உரையாற்றிய அவர், திருஅவையின் பணி உள்நோக்கப் புதுப்பிப்பில் மட்டும் முடிவடையாமல், நீதி, அமைதி மற்றும் படைப்பைப் பாதுகாப்பதற்காகவும் குரல் கொடுக்க வேண்டியது அவசியம் என்று கூறினார்.

மிசெரியோர் அமைப்பின் பணிகளை அறிமுகப்படுத்திய அருள்பணி ஃப்ரிக் அவர்கள், தற்போது 83 நாடுகளில் 1,600-க்கும் மேற்பட்ட கூட்டாளி அமைப்புகளுடன் இணைந்து ஏறத்தாழ 3,000 வளர்ச்சித் திட்டங்களை செயல்படுத்தி வருவதாகவும், அவற்றில் ஆசியாவின் பல மறைமாவட்டங்களும் திருஅவை அமைப்புகளும் இடம்பெற்றுள்ளன என்றும் தெரிவித்தார்.

கடந்த இரண்டு ஆண்டுகளாக மிசெரியோர் நிறுவனத்தின் தலைமை இயக்குனராக பணியாற்றி வரும் அவர், "இன்றும் நாளையும் உலகம் எதிர்கொள்ளும் சவால்களுக்கு திருஅவை எவ்வாறு நம்பகமான மற்றும் அர்த்தமுள்ள பதிலை வழங்க முடியும்?" என்ற கேள்வியே தனது பணியை வழிநடத்தி வருவதாகக் குறிப்பிட்டார். இதுவே மாமன்ற (Synodal) மற்றும் மறைப்பணித் திருஅவையாக வளர வேண்டும் என்ற FABC-யின் நோக்கத்தின் மையக் கேள்வியும் ஆகும் என்றார்.

பேரவையின் "பாலங்களாகவும் பாலம் கட்டுவோராகவும் இருப்போம்" என்ற கருப்பொருளை மேற்கோள்காட்டிய அவர், "பாலம் கட்டுவது என்பது சுரங்கப்பாதைகளையும் உருவாக்குவதாகும்; அதாவது ஆழமான அடித்தளத்துடன் உறவுகளை உருவாக்குவதாகும்" என்று கூறி, உண்மையான ஒன்றிணைந்த பயணம் என்பது தற்காலிகத் தீர்வுகளால் அல்ல, நம்பிக்கை மற்றும் ஒற்றுமையின் உறுதியான அடித்தளத்தால் உருவாகிறது என்று விளக்கினார்.

கடந்த அறுபது ஆண்டுகளுக்கும் மேலாக மிசெரியோர் அமைப்பு ஏழைகள் மற்றும் விளிம்புநிலை மக்களுடன் இணைந்து செயல்பட்டு, அவர்களது உரிமைகளுக்காக கொள்கை வகுப்போரிடம் குரல் கொடுத்து வருவதாகவும், இந்தப் பணி நற்செய்தியின் மனித மாண்பு மற்றும் நீதிக்கான அழைப்பில் வேரூன்றியுள்ளது என்றும் அவர் தெரிவித்தார்.

"விளிம்புநிலை மக்களுக்காக இறைவாக்குரைக்கும் திருஅவையாகவும், நீதி, அமைதி மற்றும் சூழலியல் மனமாற்றத்திற்காக குரல் கொடுக்கும் திருஅவையாகவும் நாம் தொடர்ந்து செயல்பட வேண்டும்" என்று அவர் வலியுறுத்தினார்.

மேலும், பருவநிலை நீதியே (Climate Justice) இன்று திருஅவை எதிர்கொள்ளும் முக்கியமான சவால்களில் ஒன்றாகும் என்றும், சுற்றுச்சூழல் அழிவு, வறுமை, புலம்பெயர்தல், இயற்கை வளங்களைச் சுற்றிய மோதல்கள் மற்றும் சமூக ஏற்றத்தாழ்வுகள் ஆகியவை ஒன்றோடொன்று பின்னிப் பிணைந்தவை என்றும் அவர் சுட்டிக்காட்டினார்.

2011ஆம் ஆண்டு முதல் சூழலியல் தொடர்பான பிரச்சினைகளில் FABC தொடர்ந்து கவனம் செலுத்தி வருவதற்கு பாராட்டுத் தெரிவித்த அவர், இந்த ஒன்றோடொன்று தொடர்புடைய சவால்களுக்கு ஒருங்கிணைந்த மறைப்பணிப் பார்வையுடன் ஆசியத் திருஅவை தொடர்ந்து பதிலளிக்க வேண்டும் என்று அழைப்பு விடுத்தார்.

மேலும், ஒன்றிணைந்த பயணம் பெண்கள், இளைஞர்கள் மற்றும் பொதுநிலையினரின் முழுமையான பங்கேற்பைத் தேவைப்படுத்துகிறது என்றும், அவர்களது குரல்கள் திருஅவையின் மறைப்பணிக்கு இன்றியமையாதவை என்றும் குறிப்பிட்டார்.

"பெண்கள், இளைஞர்கள் மற்றும் பொதுநிலையினரின் குரல்களால்தான் மாமன்றப் பயணம் செழிக்கும். அவர்களின் மாண்பு, மதிப்பு மற்றும் பாதுகாப்பான இடங்களை உறுதிப்படுத்துவது நமது முக்கியப் பொறுப்பாகும்" என்று அவர் கூறினார்.

அதோடு, திருஅவையின் கட்டமைப்புகளும் நடைமுறைகளும் பங்கேற்பு மற்றும் பகிரப்பட்ட பொறுப்புணர்வு என்ற மாமன்றப் பார்வையை உண்மையாக பிரதிபலிக்கின்றனவா என்பதை தொடர்ந்து ஆய்வு செய்ய வேண்டிய அவசியத்தையும் அவர் வலியுறுத்தினார்.

தனது உரையின் நிறைவில், ஏழைகளுடன் இணைந்து பயணிப்பதிலும், நீதியை நிலைநாட்டுவதிலும், படைப்பைப் பாதுகாப்பதிலும் ஆயர்களும் பிரதிநிதிகளும் தொடர்ந்து அர்ப்பணிப்புடன் செயல்பட வேண்டும் என்று அவர் அழைப்பு விடுத்தார்.

இந்த உரையின் மூலம், ஒன்றிணைந்த மனமாற்றம் என்பது திருஅவையின் உள்புறப் புதுப்பிப்பால் மட்டுமல்ல; மாறாக, விளிம்புநிலை மக்களுடன் எவ்வளவு உண்மையுடன் நிற்கிறது, நீதி, அமைதி மற்றும் படைப்பின் முழுமைக்காக எவ்வளவு இறைவாக்குரைக்கிறது என்பதாலேயே அளவிடப்படுகிறது என்ற FABC பேரவையின் முக்கியக் கருத்தை அவர் மீண்டும் உறுதிப்படுத்தினார்.