இந்திய கத்தோலிக்க ஆயர் பேரவை (CCBI), செப்டம்பர் 14ஆம் நாள் தனது 100ஆவது செயற்குழுக் கூட்டத்தை நடத்தி ஒரு முக்கியமான மைல்கல்லைப் பதிவு செய்தது. பேரவையின் தலைவர் கர்தினால் பிலிப் நேரி ஃபெர்ராவ் அவர்கள், பேரவையின் கடந்த காலப் பயணத்திற்காக இறைவனுக்கு நன்றி செலுத்துவதற்கும், எதிர்காலத்திற்கான அதன் பார்வையைப் புதுப்பிப்பதற்குமான தருணமாக இந்நிகழ்வு அமைந்துள்ளது என்று தெரிவித்தார்.
தமது தலைவர் உரையில், 1988ஆம் ஆண்டு ஏப்ரல் 14ஆம் நாள் கேரளாவின் கோட்டயத்தில், பேராயர் சைமன் பிமென்டா அவர்களின் தலைமையில் இந்திய கத்தோலிக்க ஆயர் பேரவையின் முதல் செயற்குழுக் கூட்டம் நடைபெற்றதை கர்தினால் பிலிப் நேரி அவர்கள் நினைவுகூர்ந்தார். அக்கூட்டத்தின்போது, கொல்கத்தா பேராயர் ஹென்றி டி'சூசா அவர்கள் பேரவையின் தற்காலிக ஒருங்கிணைப்பாளராகத் தேர்ந்தெடுக்கப்பட்டார்.
1988ஆம் ஆண்டு ஏப்ரல் 22ஆம் நாள் கோட்டயத்தில் இந்திய கத்தோலிக்க ஆயர் பேரவையின் முதல் பொதுக்கூட்டம் நடைபெற்றது. இதன் மூலம் இந்தியாவில் இலத்தீன் கத்தோலிக்க திருஅவையின் புதிய அத்தியாயம் முறையாகத் தொடங்கியது.
“1988ஆம் ஆண்டு எளிமையான அந்தத் தொடக்கத்திலிருந்து, நீண்டதும் நிகழ்வுகள் நிறைந்ததுமான பயணத்தை நாம் மேற்கொண்டுள்ளோம்” என்று கூறிய கர்தினால் பிலிப் நேரி அவர்கள், இந்தியத் திருஅவைக்கான பேரவையின் கட்டமைப்புகள், மேய்ப்புப்பணி நோக்கு மற்றும் சேவை ஆகியவற்றில் ஏற்பட்டுள்ள வளர்ச்சியை நினைவுகூர்ந்தார்.
பேரவையை வழிநடத்திய இறைவனுக்கு நன்றி தெரிவித்த அவர், செயற்குழுவில் பணியாற்றிய முன்னாள் நிர்வாகிகளுக்கும் ஆயர்களுக்கும் தனது பாராட்டுகளையும் நன்றியையும் தெரிவித்தார்.
“இந்த 100ஆவது கூட்டம் வெறுமனே ஒரு எண்ணைக் கொண்டாடுவதற்கான நிகழ்வு அல்ல. இது அருளின் தருணமும், பொறுப்புணர்வின் தருணமும் ஆகும்” என்று அவர் கூறினார்.
இக்கூட்டத்தின் முக்கியக் கவனமாக, “இணைவு, பங்கேற்பு மற்றும் பணிக்கான ஒரு திருச்சபை ஒன்றிப்புப் பாதையை வகுத்தல்: இந்திய கத்தோலிக்க ஆயர் பேரவையை மறுபரிசீலனை செய்தலும் மறுகட்டமைத்தலும்” என்ற ஆவணம் அமைந்தது.
இந்த முன்மொழிவு வெறுமனே கட்டமைப்பு மாற்றங்களை மட்டும் நோக்கமாகக் கொண்டதல்ல என்றும், திருஅவையிலும் சமூகத்திலும் மாறிவரும் சூழல்களுக்கு பேரவை மிகவும் திறம்படப் பதிலளிக்க உதவுவதே இதன் நோக்கம் என்றும் கர்தினால் பிலிப் நேரி அவர்கள் தெரிவித்தார்.
இந்திய கத்தோலிக்க ஆயர் பேரவையின் கட்டமைப்புகளை மறுஆய்வு செய்தல், ஆயர்களிடையேயான ஒத்துழைப்பை வலுப்படுத்துதல் மற்றும் திருச்சபையாக இணைந்து பயணிக்கும் முறைக்கான ஆழமான அர்ப்பணிப்பை வளர்த்தல் ஆகியவற்றை இவ்வாவணம் வலியுறுத்துகிறது.
இவ்வாவணம் ஏற்றுக்கொள்ளப்பட்டால், எதிர்வரும் இந்திய கத்தோலிக்க ஆயர் பேரவையின் பொதுக்கூட்டத்திற்கான தயாரிப்பு ஆவணமாக அது அமையும். பொதுக்கூட்டத்திற்கு முன்னதாக மேற்கொள்ளப்படும் சிந்தனை, கலந்தாலோசனை மற்றும் இறைவேண்டல் சார்ந்த தேர்ந்து தெளிதல் ஆகியவற்றுக்கு இது வழிகாட்டியாக இருக்கும். பின்னர், பொதுக்கூட்டத்தில் எடுக்கப்படும் தீர்மானங்கள் மற்றும் வழங்கப்படும் வழிகாட்டுதல்களை நடைமுறைப்படுத்துவதற்கான செயல்பாட்டு ஆவணமாகவும் இது அமையும் என எதிர்பார்க்கப்படுகிறது.
இந்தச் செயல்முறையை “திறந்த மனதுடனும், தாழ்மையுடனும், உண்மையான ஒன்றிப்புணர்வுடனும்” அணுகுமாறு கர்தினால் பிலிப் நேரி அவர்கள் உறுப்பினர்களைக் கேட்டுக்கொண்டார். தனிப்பட்ட கவலைகளைக் கடந்து, ஒட்டுமொத்தத் திருஅவைக்கும் எது சிறந்தது என்பதை இறைவேண்டலுடன் தேர்ந்து தெளியுமாறும் அவர் அழைப்பு விடுத்தார்.
இவ்வாறு, 100ஆவது செயற்குழுக் கூட்டம், 1988ஆம் ஆண்டு தொடங்கிய இந்திய கத்தோலிக்க ஆயர் பேரவையின் பயணத்தில் ஒரு முக்கிய மைல்கல்லாக மட்டுமன்றி, இந்தியத் திருஅவையின் மாறிவரும் மேய்ப்புப்பணி சூழல்களுக்கு ஏற்ப ஒன்றிப்பு, பங்கேற்பு மற்றும் பணி ஆகியவற்றை மேலும் வலுப்படுத்துவதற்கான முக்கியமான இறைவேண்டல் சார்ந்த தேர்ந்து தெளிதல் கட்டமாகவும் அமைந்தது.
Daily Program
