ஜூலை 22 அன்று, ஆசிய ஆயர் பேரவைகளின் கூட்டமைப்பின் (FABC) 12-வது நிறைவிறுதிப் பேரவையில் பங்கேற்றவர்களுக்காக கர்தினால் லூயிஸ் அன்டோனியோ டாக்லே அவர்கள் வழிநடத்திய ஒருநாள் தியானம், வழக்கமான ஆன்மீக உரையைத் தாண்டி, "ஆவியில் உரையாடல்" (Conversation in the Spirit) எனப்படும் செபம், அமைதி, செவிமடுத்தல் மற்றும் பகுத்தறிவை மையமாகக் கொண்ட தனித்துவமான ஒன்றிணைந்த பயிற்சியாக அமைந்தது.
ஜகார்த்தாவில் உள்ள ஹோலி முலியா (Holy Mulia) வளாகத்தின் வண்டா (Vanda) அரங்கில் இடம்பெற்ற ஒன்றரை மணி நேர அமர்வு, கர்தினால் டாக்லே அவர்களின் தியான உரையைத் தொடர்ந்து இடம்பெற்றது. அந்த உரையில், இறைவார்த்தையால் உருவாக்கப்பட்ட சீடர்களாகவும், மறைப்பணி மற்றும் ஒன்றிப்பிற்கான "பாலங்களாக" அழைக்கப்பட்டவர்களாகவும் வாழ்வது குறித்து பங்கேற்பாளர்கள் சிந்திக்க அழைக்கப்பட்டனர்.
"ஆவியில் உரையாடல்" அமர்வை, FABC-யின் ஒன்றிணைந்த பயண ஆணையத்தின் உறுப்பினரான டாக்டர் கிறிஸ்டினா கேங் அவர்கள் வழிநடத்தினார். இது ஒரு கலந்துரையாடலோ அல்லது விவாதமோ அல்ல; மாறாக, "சமூகச் செபம்" என்று அவர் விளக்கினார்.
அமர்வு தொடங்கியவுடன் அனைவரும் அமைதியில் மூழ்கினர். மோசே எரியும் முட்புதரில் இறைவனைச் சந்தித்த நிகழ்வை நினைவுகூர்ந்து, இறைவனுக்கும் ஒருவருக்கொருவர் முன்பாகவும் ஆன்மீக ரீதியாக "தங்கள் காலணிகளைக் கழற்றுமாறு" டாக்டர் கேங் அழைப்பு விடுத்தார். இது புனிதமான நிலத்தில் நிற்பதையும், பேரவையில் கூடியிருப்போரிடமும் அவர்களின் வாழ்வனுபவங்களிலும் இறைவன் பிரசன்னமாக இருப்பதை உணர்வதையும் குறிக்கும் அடையாளமாக விளக்கப்பட்டது.
"ஆவியில் உரையாடல்" என்பது முன்கூட்டியே தீர்மானிக்கப்பட்ட முடிவுகளுடன் வருவது அல்ல; மாறாக, செவிமடுத்தல், செபம் மற்றும் தியானத்தின் வழியாக தூய ஆவியின் வழிநடத்தலுக்குத் திறந்த மனதுடன் இணைந்து பயணிக்கும் ஒரு செயல்முறை என்று அவர் கூறினார்.
இந்த அமர்வு கர்தினால் டாக்லே அவர்களின் தியான உரையை அடிப்படையாகக் கொண்டு, பங்கேற்பாளர்களிடம் இரண்டு கேள்விகளை முன்வைத்தது:
- பாலங்களாக மாறும் பயணத்தில் தாங்கள் எதிர்கொண்ட சவால்களும் வாய்ப்புகளும் என்ன?
- மறைப்பணி மற்றும் ஒன்றிப்பிற்கான பாலங்களாக இருப்பது குறித்து இயேசுவிடமிருந்து என்ன கற்றுக்கொள்ள விரும்புகிறோம்?
இந்தப் பயிற்சி மூன்று கட்டங்களாக நடைபெற்றது.
முதல் கட்டத்தில், ஒவ்வொருவரும் தங்களது தனிப்பட்ட செபத்தில் பெற்ற அனுபவங்களைப் பகிர்ந்துகொண்டனர். மற்றவர்கள் எந்தவித குறுக்கீடும், கருத்தும், பதிலும் அளிக்காமல் கவனமாகச் செவிமடுத்தனர். இங்கு வாதங்களை முன்வைப்பது முக்கியமல்ல; மாறாக, செபத்தில் வெளிப்பட்ட அனுபவங்களை நேர்மையாகப் பகிர்வதே நோக்கமாக இருந்தது.
இந்தப் பயிற்சியின் மையமாக இருந்தது செவிமடுத்தல். மற்றவர்களின் வார்த்தைகளை மட்டும் அல்லாமல், அவற்றின் பின்னால் இருக்கும் உணர்வுகளையும், ஆன்மீக உந்துதல்களையும் கவனிக்குமாறு பங்கேற்பாளர்கள் ஊக்குவிக்கப்பட்டனர். கருத்து வேறுபாடுகள் தோன்றினாலும், அவற்றை திறந்த மனதுடனும், அன்புடனும், ஆர்வத்துடனும், கற்றுக்கொள்ளும் மனப்பான்மையுடனும் ஏற்றுக்கொள்ளுமாறு கேட்டுக்கொள்ளப்பட்டனர்.
ஒவ்வொரு பகிர்விற்குப் பின்னரும் அமைதிக்கான நேரம் ஒதுக்கப்பட்டது. உடனடியாகப் பதிலளிப்பதற்குப் பதிலாக, தங்கள் இதயத்தைத் தொட்டது எது, தங்களை ஊக்குவித்தது அல்லது சவாலிட்டது எது, தாங்கள் எவ்வளவு ஆழமாகச் செவிமடுத்தனர் என்பதைக் குறித்து ஒவ்வொருவரும் சிந்தித்தனர்.
இரண்டாம் கட்டத்தில், பங்கேற்பாளர்கள் தங்களது கருத்துகளை மீண்டும் கூறவில்லை. மாறாக, மற்றவர்களின் அனுபவங்களைக் கேட்டு தாங்கள் எவ்வாறு உள்ளத்தில் தொடப்பட்டனர் என்பதையே பகிர்ந்தனர். தனிப்பட்ட கருத்துகளை வெளிப்படுத்துவதை விட, மற்றவர்களின் வாழ்வனுபவங்களின் வழியாக தூய ஆவி செயல்படுவதை உணர்வதே இந்தக் கட்டத்தின் மையமாக இருந்தது.
மீண்டும் சிறிது நேர அமைதிக்குப் பிறகு, மூன்றாவது மற்றும் இறுதிக் கட்டம் நடைபெற்றது. இதில், குழுவில் தூய ஆவி வெளிப்படுத்தியதாக அவர்கள் உணர்ந்த உந்துதல்களை அடையாளம் கண்டனர். பின்னர், தங்களின் அனுபவத்தை ஒன்றாக மதிப்பீடு செய்து, அனைவருக்கும் பொதுவாக வெளிப்பட்ட முக்கிய உள்ளுணர்வுகளை எடுத்துரைத்தனர்.
இந்த முறை, ஒன்றிணைந்த திருஅவையின் அடையாளமான செவிமடுத்தலின் பண்பாட்டை வளர்ப்பதை நோக்கமாகக் கொண்டது. விவாதங்கள் அல்லது பெரும்பான்மை வாக்குகள் மூலம் ஒருமித்த கருத்தை உருவாக்குவதற்குப் பதிலாக, செபம், அமைதி, ஆழ்ந்த செவிமடுத்தல் மற்றும் ஒருவரையொருவர் மதிக்கும் மனப்பான்மை வழியாகவும் இறைவனின் திருவுளத்தை இணைந்து பகுத்தறிவதே இதன் நோக்கமாகும்.
கர்தினால் டாக்லே அவர்களின் தியானத்திற்குப் பின்னர் உடனடியாக "ஆவியில் உரையாடல்" அமர்வை ஏற்பாடு செய்ததன் மூலம், அந்தக் காலை வழங்கப்பட்ட செய்தியை நடைமுறையில் செயல்படுத்தும் வாய்ப்பை ஏற்பாட்டாளர்கள் வழங்கினர். மறைப்பணி மற்றும் ஒன்றிப்பிற்கான பாலங்களாக அழைக்கப்பட்டிருப்பதை சிந்தித்த ஆயர்கள், அருள்பணியாளர்கள், துறவியர் மற்றும் பொதுநிலையினர், செபத்தில் ஒருவரை ஒருவர் ஆழமாகச் செவிமடுத்து, FABC பேரவை தொடர்ந்து நடைபெறும் இந்நேரத்தில், தூய ஆவி தங்களின் கூட்டுப் பகுத்தறிவை வழிநடத்த அனுமதித்ததன் மூலம் அந்த அழைப்பை வாழ்வில் செயல்படுத்தினர்.
Daily Program
