ஆசியாவில் ஊழல் மற்றும் திருநிலையினர் மேலாதிக்க மனப்பான்மையை எதிர்கொள்ள ஒன்றிணைந்த திருஅவை வாழ்வு அவசியம்: | FABC | Veritas Tamil

ஆசியாவில் நிலவும் ஊழல் மற்றும் திருநிலையினர் மேலாதிக்க மனப்பான்மையை (Clericalism) எதிர்கொள்ள, ஒன்றிணைந்த திருஅவை வாழ்வு (Synodality) என்ற ஆவியை வளர்ப்பது மிகவும் அவசியம் என்று ஆசிய ஆயர் பேரவைகளின் கூட்டமைப்பு (FABC) வலியுறுத்தியுள்ளது.

ஜூலை 20 அன்று இந்தோனேசியாவின் ஜகார்த்தாவில் தொடங்கிய FABC-யின் 12-வது நிறைவிறுதிப் பேரவையின் தொடக்க செய்தியாளர் சந்திப்பில் பேசிய ஆசிய ஆயர்கள், ஆசிய நாடுகளில் பரவலாகக் காணப்படும் இந்தச் சவால்கள் குறித்து தொடர்ந்து செபித்து, திருவுளப் பகுத்தறிதலின் வழியாக செயல்திட்டங்களை உருவாக்க உறுதியளித்தனர்.

FABC-யின் துணைத் தலைவரும், ஒன்றிணைந்த திருஅவை வாழ்வுக்கான ஆணையத்தின் தலைவருமான பிலிப்பீன்ஸ் கர்தினால் பாப்லோ விர்ஜிலியோ டேவிட் அவர்கள், திருஅவையின் மறைப்பணி பலனளிக்க அருள்பணியாளர்கள் மற்றும் பொதுநிலையினர் இணைந்து பொறுப்பேற்க வேண்டும் என்று வலியுறுத்தினார்.

"திருஅவையின் மறைப்பணியில் இணைப் பொறுப்புணர்வு உருவாகும்போது, திருப்பணியாளர்கள் பொதுநிலையினருக்கும் துறவிகளுக்கும் தூய ஆவியார் வழங்கியுள்ள பல்வேறு அருள்கொடைகளை அங்கீகரிக்கக் கற்றுக்கொள்வார்கள்" என்று அவர் கூறினார்.

ஆசியாவுக்கான ஆயர் மாமன்றத்தின் (Synod) இறுதி ஆவணத்தில், திருநிலையினர் மேலாதிக்க மனப்பான்மை என்பது ஆசியாவில் ஒன்றிணைந்த திருஅவை வாழ்வு வளராததற்கான முக்கிய காரணங்களில் ஒன்று என்றும், அது அதிகாரத்தில் இருப்போரின் உரிமை உணர்விலும் மேலாதிக்க அணுகுமுறையிலும் வெளிப்படுகிறது என்றும் சுட்டிக்காட்டப்பட்டுள்ளது.

மேலும், "திருமுழுக்கின் வழியாக அருள்பணியாளர்களும் பொதுநிலையினரும் ஒரே மாண்பைப் பெற்றவர்கள்; குருக்கள் உயர்ந்த கிறிஸ்தவர்கள் அல்ல" என்று கர்தினால் டேவிட் அவர்கள் வலியுறுத்தினார்.

FABC தலைவர் மற்றும் இந்தியாவின் கர்தினால் ஃபிலிப் நேரி பெர்ராவ் அவர்கள், திருமுழுக்கு அருளடையாளத்தை அடிப்படையாகக் கொண்டு, அனைவரின் பங்களிப்பையும் ஊக்குவிக்கும் புதிய மேய்ப்புப்பணித் திட்டம் இந்தியாவில் உருவாக்கப்பட்டுள்ளதாக தெரிவித்தார்.

"ஒன்றிணைந்த திருஅவை வாழ்வு என்பது ஒரு செயல்திட்டம் மட்டுமல்ல; அது திருமுழுக்கை அடிப்படையாகக் கொண்ட ஓர் ஆன்மீக வாழ்வியல். அதில் அனைவரும் சமமானவர்கள். இருப்பினும், அந்த இலக்கை அடைய நாம் இன்னும் நீண்ட பயணம் மேற்கொள்ள வேண்டியுள்ளது" என்று அவர் கூறினார்.

சமூகத்தில் நம்பிக்கைக்கும் சமூகப் பொறுப்புக்கும் இடையே பெரிய இடைவெளி இருப்பதாகக் குறிப்பிட்ட கர்தினால் டேவிட், அந்த இடைவெளியை நிரப்பி, அமைப்புரீதியான ஊழலை அகற்றுவதற்கான அறநெறி மற்றும் ஆன்மீகத் தலைமையை வழங்குவது FABC-யின் முக்கியப் பொறுப்பு என்றும் தெரிவித்தார்.

டிரான்ஸ்பரன்சி இன்டர்நேஷனல் அமைப்பின் 2025-ஆம் ஆண்டுக்கான ஊழல் உணர்வுக் குறியீட்டின்படி (Corruption Perceptions Index - CPI), ஆசியாவில் ஊழல் இன்னும் அதிக அளவில் நீடித்து வருகிறது. 31 ஆசிய நாடுகளில் 21 நாடுகள் உலகளாவிய சராசரி மதிப்பெண்ணான 42-க்குக் கீழ் மதிப்பெண் பெற்றுள்ளன. இந்தியா, வங்காளதேசம் மற்றும் இந்தோனேசியா ஆகிய நாடுகளும் அவற்றில் அடங்குகின்றன.

"ஒன்றிணைந்த மனமாற்றத்திற்கான அழைப்பும், ஆசியாவில் பாலங்களாகவும் பாலங்களை அமைப்பவர்களாகவும் இருப்பதற்கான திருப்பணியும்" என்ற கருப்பொருளில் நடைபெறும் இவ்வாண்டு FABC நிறைவிறுதிப்பேரவையில், ஆசியாவின் பல்வகைமிக்க சமூகங்களில் புதிய நற்செய்தி அறிவிப்பு வழிமுறைகள் குறித்து ஆயர்கள் ஆராய்ந்து வருகின்றனர்.

இப்பேரவையின் நிறைவில், ஆசியாவில் ஒன்றிணைந்த திருஅவை வாழ்வை நடைமுறையில் செயல்படுத்துவதற்கான வழிகாட்டியாக அமையும் இறுதி ஆவணத்தையும் FABC வெளியிட உள்ளதாக அறிவிக்கப்பட்டுள்ளது.