ஆசிய ஆயர் பேரவையின் 12ஆம் நிறைவிறுதிப்பேரவை: மின்னணு வாக்குப்பதிவு மூலம் புதிய வரலாறு | FABC | Veritas Tamil

ஜகார்த்தா, ஜூலை 21 – இந்தோனேசியாவின் ஜகார்த்தாவில் இடம்பெற்று வரும் ஆசிய ஆயர் பேரவைகளின் கூட்டமைப்பின் (FABC) 12ஆம் நிறைவிறுதிப் பேரவையின் முதல் நாளில், பேரவையின் செயல்பாடுகளை வழிநடத்தும் தலைமைப் பொறுப்பாளர்கள் மற்றும் குழுக்களைத் தேர்ந்தெடுப்பதற்காக முதன்முறையாக மின்னணு வாக்குப்பதிவு முறை பயன்படுத்தப்பட்டு புதிய வரலாறு படைக்கப்பட்டது.

ஜூலை 21 அன்று ஹோட்டல் முலியாவில் இடம்பெற்ற தேர்தலில், இறுதி ஆவணக் குழு, இறுதி செய்திக் குழு மற்றும் தலைமை அலுவலர்கள் (Presiding Officers) ஆகியோர் இணையவழி வாக்குப்பதிவு மூலம் தேர்ந்தெடுக்கப்பட்டனர். FABC நிறைவிறுதிப் பேரவையின் வரலாற்றில் மின்னணு வாக்குப்பதிவு பயன்படுத்தப்பட்டது இதுவே முதல் முறையாகும்.

இந்த மின்னணு வாக்குப்பதிவு முறையை பேரவையின் ஊடகக் குழு உருவாக்கி நிர்வகித்தது. இதற்கு இந்தோனேசிய ஆயர் பேரவையின் (KWI) தகவல் தொடர்பு அலுவலகமும், ரேடியோ வேரித்தாஸ் ஆசியா (RVA) ஊடகக் குழுவும் தொழில்நுட்ப ஒத்துழைப்பு வழங்கின.

Google Forms தளத்தின் மூலம் ஆயர்கள் தங்களது கைப்பேசிகளில் வாக்களித்தனர். வாக்களிப்பதற்கு முன்பு, மையத் திரையில் காட்டப்பட்ட QR குறியீட்டை (QR Code) ஸ்கேன் செய்து மின்னணு முறையில் பதிவு செய்தனர். பதிவு செய்வதில் அல்லது வாக்களிப்பதில் சிரமம் ஏற்பட்டவர்களுக்கு தகவல் தொடர்புக் குழுவின் தன்னார்வலர்கள் உதவி புரிந்தனர்.

FABC துணைத் தலைவர் கர்தினால் பாப்லோ விர்ஜிலியோ எஸ். டேவிட் அவர்கள் தேர்தல் அலுவலராகச் செயல்பட்டார். ஒவ்வொரு சுற்று வாக்குப்பதிவுக்கும் முன் தேர்வு செய்யப்படும் குழுவின் பொறுப்புகளை விளக்கி, போட்டியிடத் தகுதியானவர்களையும் வாக்களிக்கும் உறுப்பினர்களையும் அறிமுகப்படுத்திய அவர், வாக்குப்பதிவு முடிந்தவுடன் உடனடியாக முடிவுகளையும் அறிவித்தார்.

முழு தேர்தல் நடைமுறையும் ஏறத்தாழ 30 நிமிடங்களில் நிறைவடைந்தது. பாரம்பரிய காகித வாக்குச்சீட்டு அல்லது கைகளை உயர்த்தி வாக்களிக்கும் முறையைப் பயன்படுத்தியிருந்தால் இதைவிட அதிக நேரம் எடுத்திருக்கும் என்று ஏற்பாட்டாளர்கள் தெரிவித்தனர்.

வாக்குப்பதிவுக்கு முன்னர், பிலிப்பைன்ஸின் காசெரஸ் பேராயர் ரெக்ஸ் ஆண்ட்ரூ கிளெமென்ட் அலார்கோன் அவர்கள், ஒரு நடைமுறைச் சந்தேகத்தை எழுப்பினார். FABC விதிமுறைகளில் காகித வாக்குச்சீட்டு அல்லது கைகளை உயர்த்தி வாக்களிப்பது மட்டுமே குறிப்பிடப்பட்டுள்ளதாகவும், மின்னணு வாக்குப்பதிவு குறித்து எதுவும் குறிப்பிடப்படவில்லை என்றும் அவர் சுட்டிக்காட்டினார். எனவே, இணையவழி வாக்குப்பதிவைப் பயன்படுத்த பேரவையின் ஒப்புதல் அவசியம் என்று தெரிவித்தார்.

இதனை கர்தினால் டேவிட் அவர்கள் அதிகாரப்பூர்வ தீர்மானமாக முன்வைத்தார். அதற்கு ஆதரவு கிடைத்ததோடு, எவ்வித எதிர்ப்பும் எழாததால், பேரவை உறுப்பினர்கள் ஒருமனதாக மின்னணு வாக்குப்பதிவுக்கு ஒப்புதல் அளித்தனர்.

பேரவையின் முக்கிய ஆவணங்களைத் தயாரிக்கும் குழுக்கள்

இதற்கு முன்னர், FABC இணைப் பொதுச் செயலர் அருள்பணி கிளாரன்ஸ் தேவதாஸ் அவர்கள் தேர்ந்தெடுக்கப்படும் மூன்று அமைப்புகளின் பொறுப்புகளை விளக்கினார். இந்தப் பேரவையின் முக்கிய இரண்டு ஆவணங்களாக "ஆசியாவில் ஒன்றிணைந்த (Synodality) குறித்த வழிகாட்டி (Vademecum)" மற்றும் 12ஆம் FABC நிறைவிறுதிப்  பேரவையின் இறுதி செய்தி ஆகியவை தயாரிக்கப்பட உள்ளன என்று அவர் தெரிவித்தார்.

இறுதி ஆவணக் குழு, பொதுக்கூட்ட உரைகள், குழு அறிக்கைகள் மற்றும் பங்கேற்பாளர்களின் கருத்துகளை அடிப்படையாகக் கொண்டு வழிகாட்டி ஆவணத்தின் வடிவமைப்பை உருவாக்கும். இந்த ஆவணம், ஒன்றிணைந்த பயணம் குறித்த உலக ஆயர் பேரவையின் இறுதி ஆவணத்தையும், FABC பாங்காக் ஆவணத்தையும் அடிப்படையாகக் கொண்டு, ஆசிய ஆயர்கள் ஒன்றிணைந்த பயணத்தை நடைமுறைப்படுத்த உதவும் வழிகாட்டியாக அமையும்.

தேர்ந்தெடுக்கப்பட்ட உறுப்பினர்கள்

இறுதி ஆவணக் குழுவிற்கு:

• கர்தினால் தார்சிசியோ இசாவோ கிகுச்சி (டோக்கியோ பேராயர், FABC பொதுச் செயலர்)
• கர்தினால் பிலிப் நேரி பெர்ராவ் (கோவா மற்றும் டாமன் பேராயர், FABC தலைவர்)
• கர்தினால் பாப்லோ விர்ஜிலியோ எஸ். டேவிட் (கலூகான் ஆயர், FABC துணைத் தலைவர்)
• ஆயர் அந்தோனி ஜேம்ஸ் கோர்கோரன், SJ (கிர்கிஸ்தானின் திருத்தந்தை நிர்வாகி)

இறுதி செய்திக் குழுவிற்கு:

• கர்தினால் ஸ்டீபன் சௌ சாவ்-யான், SJ (ஹாங்காங் ஆயர்)
• கர்தினால் அந்தோணி பூலா (ஐதராபாத் பேராயர், இந்தியா)
• பேராயர் ஜூலியன் லியோ பெங் கிம் (கோலாலம்பூர், மலேசியா)
• பேராயர் கில்பர்ட் ஏ. கார்சேரா (லிபா, பிலிப்பைன்ஸ்)

தலைமை அலுவலர்களாக:

• பேராயர் சாக்ரட்டீஸ் பி. வில்லேகாஸ் (லிங்காயென்–டகுபான், பிலிப்பைன்ஸ்)
• பேராயர் பெஜோய் என். டி'குரூஸ், OMI (டாக்கா, வங்கதேசம்)
• ஆயர் அந்தோனியுஸ் சுபியாந்தோ புஞ்சாமின், OSC (பாண்டுங், இந்தோனேசியா)

இவர்கள், FABC தலைவர், துணைத் தலைவர் மற்றும் பொதுச் செயலருடன் இணைந்து பேரவையின் தினசரி அமர்வுகளை வழிநடத்தும் வழிநடத்தல் குழுவில் (Steering Committee) பணியாற்றுவார்கள்.

"ஆசியாவில் ஒன்றிணைந்த பயணத்திற்கான மனமாற்றமும் பாலம் கட்டும் மறைப்பணியும்" என்ற கருப்பொருளுடன் நடைபெறும் இந்தப் பேரவையின் முக்கிய பணிகள் இத்தேர்தலுடன் தொடங்கியுள்ளன. அதேவேளை, மின்னணு வாக்குப்பதிவு அறிமுகப்படுத்தப்பட்டிருப்பது, பங்கேற்பு, வெளிப்படைத்தன்மை மற்றும் கூட்டுத் தீர்மானம் என்ற ஒன்றிணைந்த அணுகுமுறையைப் பின்பற்றியபடி புதிய தொழில்நுட்பங்களை திருஅவை ஏற்றுக்கொள்வதற்கான தயார்நிலையையும் வெளிப்படுத்தியுள்ளது.