ஒன்றிணைந்த பயணம் உலகிற்குத் திருஅவை வழங்கும் மிகப்பெரிய கொடை - கர்தினால் ஒஸ்வால்ட் கிராசியஸ் | FABC | Veritas Tamil

திருத்தந்தை லியோ XIV அவர்களின் பிரதிநிதியாகப் பங்கேற்ற கர்தினால் ஒஸ்வால்ட் கிராசியஸ், ஆசிய ஆயர் பேரவைகளின் கூட்டமைப்பின் (FABC) 12ஆவது நிறைவிறுதிப் பேரவையின் தொடக்கத் திருப்பலிக்குத் தலைமையேற்று, "ஒன்றிணைந்த பயணம் என்பது உலகிற்குத் திருஅவை வழங்கும் மிகப்பெரிய கொடைகளில் ஒன்றாகும்" என்று வலியுறுத்தினார். மேலும், ஆசியத் திருஅவைகள் உரையாடல், நல்லிணக்கம் மற்றும் சகோதரத்துவத்தின் வழியாக அமைதியின் பாலங்களைக் கட்டும் திருஅவையாக மாற வேண்டும் என்று அழைப்பு விடுத்தார்.

ஜகார்த்தாவில் உள்ள ஹோட்டல் முலியாவின் பால்ரூம் 2 மற்றும் 3 அரங்குகளில் காலை 9 மணிக்கு நடைபெற்ற தொடக்கத் திருப்பலிக்குத் தலைமையேற்ற அவர், திருஅவையின் பணி மக்களை ஒன்றிணைப்பதும், நல்லிணக்கத்தை ஏற்படுத்துவதும், உலகில் அமைதிக்கான கருவியாக விளங்குவதும்தான் என்று தனது மறையுரையில் எடுத்துரைத்தார்.

"நமது பணி பாலங்களைக் கட்டுபவர்களாக மாறுவதாகும். திருஅவை பாலங்களைக் கட்டுவதற்கே அழைக்கப்பட்டுள்ளது," என்று அவர் கூறினார்.இந்தத் தொடக்கத் திருப்பலி, இந்தோனேசியாவின் பல்வேறு பண்பாட்டு மரபுகளையும், ஆசியத் திருஅவையின் பன்முகத்தன்மையையும் பிரதிபலிக்கும் வகையில் சிறப்பாக வடிவமைக்கப்பட்டது.

வாரம் முழுவதும் நடைபெறும் இந்த மாநாட்டில் கலந்துகொள்ள ஆசியாவின் பல்வேறு பகுதிகளிலிருந்து வந்திருந்த 100-க்கும் மேற்பட்ட கர்தினால்கள், ஆயர்கள், அருட்பணியாளர்கள், துறவியர் மற்றும் பிரதிநிதிகளுடன் இணைந்து, கர்தினால் கிரேசியஸுடன் ஹாங்காங்கின் கார்டினல் ஸ்டீபன் சௌ சாவ்-யான் மற்றும் திமோர்-லெஸ்டேயின் கார்டினல் விர்ஜிலியோ தோ கர்மோ தா சில்வா ஆகியோர் முதன்மை கூட்டுத் திருப்பலி நிறைவேற்றுபவர்களாகப் பங்கேற்றனர்."

திருப்பலியின் நுழைவு ஊர்வலத்தின்போது, இந்தோனேசியாவின் வட சுமத்ரா மாகாணத்தின் பாரம்பரிய உடைகளை அணிந்திருந்த நியாஸ், படாக் மற்றும் மினாங்கபாவ் இன மக்களைச் சேர்ந்த ஆண்களும் பெண்களும் ஆயர்களையும் பிரதிநிதிகளையும் அன்புடன் வரவேற்றனர். இந்த வரவேற்பு, இந்தோனேசியாவின் வளமான இன மற்றும் பண்பாட்டு பாரம்பரியத்தையும், வரவேற்பளிக்கும் உள்ளூர் திருஅவையின் விருந்தோம்பலையும் அழகாக வெளிப்படுத்தியது.

இறைமக்களின் மன்றாட்டுகள் (Prayers of the Faithful) கூட ஆசியாவின் மொழிப் பன்முகத்தன்மையை எடுத்துக்காட்டின. ஜாவானீஸ், மெந்தாவாய், மாண்டரின் சீனம், போர்னியோவின் பெனாவாஸ் தயாக், கிழக்கு நுசா தெங்காராவின் சும்பானீஸ் உள்ளிட்ட பல்வேறு மொழிகளில் மன்றாட்டுகள் வாசிக்கப்பட்டன. இந்தப் பல்மொழி மன்றாட்டுகள், பல இனங்கள், பண்பாடுகள் மற்றும் மொழிகளைக் கொண்ட ஆசியாவில் திருஅவையின் ஒற்றுமையை வலியுறுத்தின.

திருப்பலியின் மற்றொரு சிறப்பம்சமாக, புனிதர்களின் மன்றாட்டு (Litany of the Saints) இடம்பெற்றது. இதில் சீனா, இந்தியா, ஜப்பான், கொரியா, மலேசியா, பிலிப்பைன்ஸ், இலங்கை, ஹாங்காங், தாய்லாந்து, மியான்மர், கசகஸ்தான், இந்தோனேசியா, லாவோஸ் மற்றும் ஆப்கானிஸ்தான் ஆகிய நாடுகளைச் சேர்ந்த புனிதர்களின் பரிந்துரையை வேண்டி பேரவையினர் இணைந்து மன்றாடினர். இது ஆசியக் கண்டத்தின் செழுமையான கிறிஸ்தவ மரபை நினைவூட்டியது.

கடந்த ஐம்பது ஆண்டுகளுக்கும் மேலான FABC பயணத்தை நினைவுகூர்ந்த அவர், கொரோனா (COVID-19) பெருந்தொற்று சமீபகாலங்களில் திருஅவை எதிர்கொண்ட மிகப்பெரிய சவால்களில் ஒன்றாக இருந்ததாகக் குறிப்பிட்டார். அந்தப் பெருந்தொற்று ஆசியா முழுவதும் துன்பத்தை ஏற்படுத்தியிருந்தாலும், அதேவேளையில் ஆசியத் திருஅவைகளின் உறுதிப்பாடு, ஒற்றுமை மற்றும் இணைந்து செயல்படும் ஆவியை வெளிப்படுத்தியது என்றும் கூறினார்.

இன்றைய உலகில் போர்களும் வன்முறைகளும் மனிதகுலம் எதிர்கொள்ளும் மிகப்பெரிய சவால்களாக உள்ளன என்றும் அவர் சுட்டிக்காட்டினார். இதனை நினைவூட்டும் வகையில், திருத்தந்தை பிரான்சிஸ் தற்போதைய உலகச் சூழலை "துண்டு துண்டாக நடைபெறும் மூன்றாம் உலகப் போர்" என்று விவரித்ததை அவர் மேற்கோள் காட்டினார்.

ஒன்றிணைந்த பயணம் திருஅவைக்கும் சமூகத்திற்கும் இறைவன் அளித்த ஒரு வரம் என்று கர்தினால் கிராசியஸ் குறிப்பிட்டார். குடும்ப வாழ்க்கை, சமூக ஒற்றுமை மற்றும் பரஸ்பர மரியாதை ஆகியவற்றின் வழியாக ஒன்றாகப் பயணிக்கும் பண்பாடு ஆசிய கலாச்சாரங்களில் நீண்டகாலமாகவே இருந்து வருகிறது என்றார். மேலும், கேட்டறிதல், பங்கேற்பு, திறந்த மனப்பான்மை மற்றும் பகிர்ந்த பொறுப்புணர்வு ஆகிய சினோடல் மதிப்புகள் நல்லாட்சியை வலுப்படுத்துவதோடு, ஆசியாவின் பல பகுதிகளில் காணப்படும் ஊழலைக் குறைப்பதற்கும் உதவக்கூடும் என்று தெரிவித்தார்.திருப்பலியின் நிறைவில், ஆசியா முழுவதும் அமைதியையும் சகோதரத்துவத்தையும் வளர்க்கும் புதிய மற்றும் படைப்பாற்றல்மிக்க வழிகளை தேடி செயல்படுமாறு பேரவையில் பங்கேற்ற பிரதிநிதிகளை அவர் ஊக்குவித்தார்.