ஒன்றிணைந்த பயணம் ஆவணங்களைத் தாண்டி உறவுகள், முடிவெடுப்பு மற்றும் பணியின் புதுப்பித்தலாக அமைய வேண்டும்: சியோல் பேராயர் | VERITAS TAMIL

ஒன்றிணைந்த பயணம் வெறும் ஆவணங்களுடன் முடிவடையாமல், உறவுகள், முடிவெடுக்கும் நடைமுறைகள் மற்றும் திருஅவையின் பணியைப் புதுப்பிக்கும் பாதையாக அமைய வேண்டும் என்று சியோல் பேராயர் பீட்டர் சூன்-டைக் சுங் அவர்கள் ஆசிய தேசிய ஒன்றிணைந்த பயணக் குழுக்களின் உறுப்பினர்களிடம் வலியுறுத்தியுள்ளார்.

ஆசிய தேசிய ஒன்றிணைந்த பயணக் குழுக்களின் மூன்று நாள் சந்திப்பின் முதல் நாள் நிறைவையொட்டி, செப்டம்பர் 1ஆம் தேதி பாங்காக்கில் உள்ள பான் பூ வான் மேய்ப்புப்பணி பயிற்சி மையத்தின் புனித மைக்கேல் சிற்றாலயத்தில் நடைபெற்ற திருப்பலிக்கு பேராயர் சுங் அவர்கள் தலைமை தாங்கினார்.

ஆசிய ஆயர் பேரவைகளின் கூட்டமைப்பின் (FABC) துணைத்தலைவர் கர்தினால் பாப்லோ விர்ஜிலியோ டேவிட், மியான்மர் யாங்கூன் துணை ஆயர் மற்றும் பிற அருட்பணியாளர்கள் அவருடன் இணைந்து திருப்பலி நிறைவேற்றினர். மூன்று நாள் சந்திப்பின் முதல் நாளை நிறைவு செய்த இத்திருப்பலியில், வியட்நாம் நாட்டைச் சேர்ந்த பிரதிநிதிகள் திருப்பலி பாடல்களை வழிநடத்தினர்.

“ஒன்றிணைந்த பயணம் ஓர் ஆவணத்துடன் முடிவடைய முடியாது”

தமது மறையுரையில் பேராயர் சுங், ஒன்றிணைந்த பயணம் என்பது தூய ஆவியாரின் வழிகாட்டுதலின் கீழ் இறைமக்கள் அனைவரும் ஒன்றிணைந்து பயணிப்பதும் பணியாற்றுவதுமாகும் என்று விளக்கினார்.

2021ஆம் ஆண்டு தொடங்கிய ஆயர்களின் உலகளாவிய மன்றம், 2024ஆம் ஆண்டு இறுதி ஆவணம் வெளியிடப்பட்டதன் மூலம் முக்கியமான கட்டத்தை எட்டியிருந்தாலும், ஒன்றிணைந்த பயணம் இன்னும் நிறைவடையவில்லை என்று அவர் வலியுறுத்தினார்.

“ஒன்றிணைந்த பயணம் ஓர் ஆவணத்துடன் முடிவடைய முடியாது” என்று கூறிய அவர், அது உறவுகள், மனப்பான்மைகள், வார்த்தைகள் மற்றும் திருஅவை வாழ்வின் புதுப்பித்தலுக்கு வழிவகுக்க வேண்டும் என்று தெரிவித்தார்.

தற்போதைய நடைமுறைப்படுத்தும் கட்டத்தில், ஒன்றிணைந்த பயணத்தின் உணர்வை திருஅவை வாழ்வில் செயல்படுத்த உதவும் நான்கு முக்கிய அம்சங்களை அவர் எடுத்துரைத்தார்.

1. உறவுகளையும் மனப்பான்மைகளையும் புதுப்பித்தல்

முதலாவதாக, ஒன்றிணைந்த பயணத்திற்கு உறவுகள் மற்றும் மனப்பான்மைகளின் மாற்றம் தேவை என்று பேராயர் சுங் அவர்கள் கூறினார். மாற்றம் என்பது தனிநபரின் விசுவாசத்தில் ஏற்படும் மாற்றமாக மட்டும் புரிந்துகொள்ளப்படக் கூடாது. மாறாக, ஒருவர் மற்றவருடன் எவ்வாறு உறவு கொள்கிறார், திருஅவை எவ்வாறு நிர்வகிக்கப்படுகிறது, முடிவுகள் எவ்வாறு எடுக்கப்படுகின்றன என்பதிலும் மாற்றம் ஏற்பட வேண்டும் என்று அவர் விளக்கினார். திருஅவையில் முறையான அதிகாரமும் பல்வேறு பணித்துறைகளும் உள்ளன. இருப்பினும், ஒன்றிணைந்த பயண அணுகுமுறை, ஒருவர் மற்றவரை மதித்து செவிமடுக்கவும், தூய ஆவியாரின் வழிகாட்டுதலின் கீழ் ஒன்றிணைந்து பகுத்தறியவும் அழைக்கிறது என்று அவர் கூறினார். “முடிவெடுப்பதற்கு முன் செவிமடுக்கும் திருஅவை, தீர்ப்பளிப்பதற்கு முன் புரிந்துகொள்ள முயலும் திருஅவை, முடிவுக்கு வருவதற்கு முன் ஒன்றிணைந்து செபித்து பகுத்தறியும் திருஅவை ஆகியவையே ஒன்றிப்புப் பயணத் திருஅவையின் அழகான வெளிப்பாடுகள்” என்று அவர் கூறினார்.

2. உண்மையான செவிமடுத்தலின் மூலம் “தூய ஆவியில் உரையாடல்”

இரண்டாவதாக, உண்மையான செவிமடுத்தலின் மூலம் “தூய ஆவியில் உரையாடலை” கற்றுக்கொள்ள வேண்டும் என்று அவர் வலியுறுத்தினார். மற்றவர் பேசிக்கொண்டிருக்கும்போதே, அவருக்குப் பதிலளிப்பது அல்லது எதிர்க்கருத்தைக் கூறுவது குறித்து பலர் சிந்திக்கத் தொடங்கிவிடுகிறார்கள். ஆனால், ஒன்றிணைந்த பயணத்தில் செவிமடுத்தல் என்பது, மற்றவர் வழியாக தூய ஆவியார் என்ன கூறுகிறார் என்பதை திறந்த மனதுடன் கேட்பதாகும். இதன் நோக்கம் நமது கருத்தை மற்றவர்கள் மீது திணிப்பதோ அல்லது விவாதத்தில் மற்றவரைத் தோற்கடிப்பதோ அல்ல. மாறாக, இறைவனின் திருவுளத்தை ஒன்றிணைந்து தேடுவதே இதன் நோக்கம்.

3. வெளிப்படைத்தன்மையும் பொறுப்புக்கூறலும்

மூன்றாவதாக, வெளிப்படைத்தன்மை மற்றும் பொறுப்புக்கூறல் கொண்ட பண்பாட்டை உருவாக்க வேண்டும் என்று பேராயர் சுங் அவர்கள் அழைப்பு விடுத்தார். எடுக்கப்படும் ஒவ்வொரு முடிவுக்கும், அது ஏன் எடுக்கப்பட்டது, எவ்வாறு எடுக்கப்பட்டது என்பதற்கான விளக்கம் வழங்கப்பட வேண்டும். இத்தகைய வெளிப்படைத்தன்மை இல்லாதபோது, தவறான புரிதல்கள் அவநம்பிக்கையாக மாறி, இறுதியில் திருஅவையின் ஒன்றிப்பையே பலவீனப்படுத்தக்கூடும் என்று அவர் எச்சரித்தார். பொறுமை, கனிவு மற்றும் முடிவுகளை விளக்குவதற்கான மனப்பான்மை ஆகியவை ஆயர்கள், அருட்பணியாளர்கள் மற்றும் பங்குமக்கள் இடையே உண்மையான நம்பிக்கையை வளர்க்க உதவும் என்றும் அவர் தெரிவித்தார்.

4. ஒன்றிணைந்த பயணம் திருப்பணிக்கு வழிவகுக்க வேண்டும்

இறுதியாக, ஒன்றிப்புப் பயணம் திருப்பணிக்கு வழிவகுக்க வேண்டும் என்று பேராயர் சுங் வலியுறுத்தினார். செவிமடுத்தலும் பகுத்தறிதலும் திருஅவைக்குள் உள்ள உறவுகளை மேம்படுத்துவதற்கான வழிமுறைகள் மட்டுமல்ல. அவை நற்செய்தியை அறிவிப்பதற்குத் திருஅவைக்கு உதவ வேண்டும் என்பதே அவற்றின் நோக்கம் என்று அவர் கூறினார். ஒன்றிணைந்த பயணத் திருஅவை தனது அமைப்புகளுக்கு வெளியே உள்ள மக்களிடமும் செவிமடுக்க வேண்டும். குறிப்பாக, “தனிமையில் இருப்பவர்கள், காயமடைந்தவர்கள், திருஅவையை விட்டு விலகிச் சென்றவர்கள்” ஆகியோரின் குரல்களைக் கேட்டு, அவர்களிடம் நற்செய்தியின் மகிழ்ச்சியை எடுத்துச் செல்ல வேண்டும் என்று அவர் அழைப்பு விடுத்தார்.“ஒன்றிணைந்த பயணத் திருஅவை என்பது ஒன்றிணைந்து செயல்படும் திருஅவை மட்டுமல்ல; உலகை நோக்கி ஒன்றிணைந்து புறப்பட்டுச் செல்லும் திருஅவையும் ஆகும்” என்று பேராயர் சுங் கூறினார்.

சிறிய மாற்றங்களில் தொடங்குவோம்

ஒன்றிணைந்த பயணத்தை நடைமுறைப்படுத்துவதற்கு பெரிய மாற்றங்களுக்காகக் காத்திருக்காமல், சிறிய மாற்றங்களிலிருந்து தொடங்குமாறு அவர் பங்கேற்பாளர்களை ஊக்குவித்தார். மற்றவர் பேசுவதை முழுமையாகக் கேட்பது, கருத்து வேறுபாடு ஏற்பட்டவுடன் உடனடியாகத் தீர்ப்பளிப்பதைத் தவிர்ப்பது, முடிவெடுப்பதற்கு முன் கவனமாகச் செவிமடுப்பது ஆகியவற்றை அவர் குறிப்பிட்டார். ஆசிய தேசிய ஒன்றிணைந்த பயணக் குழுக்களின் சந்திப்பின் முதல் நாள் நிறைவடைந்தபோது, பழைய நடைமுறைகளை விட்டுவிட்டு, தூய ஆவியாரில் செவிமடுத்து, பகுத்தறிந்து, ஒன்றிணைந்து செயல்படும் புதுப்பிக்கப்பட்ட சீடர்களாக மாறுவதற்கான அருளுக்காக செபிக்குமாறு பேராயர் சுங் பங்கேற்பாளர்களை அழைத்தார்.

திருஅவையின் திருப்பணிக்காக, தூய ஆவியாரின் வழிகாட்டுதலில் ஒன்றிப்புடனும் அர்ப்பணிப்புடனும் தொடர்ந்து பயணிக்க வேண்டும் என்பதே அவரது அழைப்பாக அமைந்தது.