கிழக்கு இந்தியாவின் கட்டக்–புவனேஸ்வர் உயர் மறைமாவட்டத்தின் முன்னாள் பேராயரான பேராயர் ரஃபேல் சீனத், SVD அவர்கள் இறந்து பத்து ஆண்டுகள் நிறைவடைந்துள்ள நிலையில், கந்தமால் வன்முறையால் பாதிக்கப்பட்ட கிறிஸ்தவர்களுக்கு உறுதியான ஆதரவு அளித்ததற்காகவும், நீதி மற்றும் மறுவாழ்வுக்காகத் தொடர்ந்து பாடுபட்டதற்காகவும் நினைவுகூரப்படுகிறார்.
பேராயர் சீனத் அவர்கள் 2016ஆம் ஆண்டு ஆகஸ்ட் 14ஆம் நாள் இறையடி சேர்ந்தார். ஒடிசாவில் 2008ஆம் ஆண்டு நடைபெற்ற வன்முறையால் பாதிக்கப்பட்டவர்களுக்கான இழப்பீடு தொடர்பாக இந்திய உச்சநீதிமன்றம் முக்கியத் தீர்ப்பு ஒன்றை வழங்கிய சிறிது காலத்திலேயே அவர் காலமானார்.
அவரது 10ஆம் ஆண்டு நினைவு நிகழ்வு ஆகஸ்ட் 12ஆம் நாள், கேரளாவின் திருச்சூர் மாவட்டத்தில் உள்ள அவரது சொந்தப் பங்கான பள்ளிசேரியில் நடைபெற்றது. திருச்சூர் துணை ஆயர் அந்தோணி நீலங்காவில் தலைமையில் நினைவுத் திருப்பலி நிறைவேற்றப்பட்டது. அதனைத் தொடர்ந்து, பேராயர் சீனத் அவர்களின் வாழ்க்கை மற்றும் பணியை நினைவுகூரும் நிகழ்வு நடைபெற்றது.
பத்திரிகையாளர், எழுத்தாளர் மற்றும் மனித உரிமை ஆர்வலரான அந்தோ அக்கரா, பேராயர் சீனத் அவர்களின் மரபு மற்றும் பணிகள் குறித்து உரையாற்றினார். குறிப்பாக, அவரது மேய்ப்புப் பணிக்கான அர்ப்பணிப்பையும், கந்தமால் வன்முறையில் உயிர் தப்பியவர்களுக்கு நீதி மற்றும் மறுவாழ்வு கிடைக்க அவர் மேற்கொண்ட முயற்சிகளையும் அவர் எடுத்துரைத்தார்.
2008ஆம் ஆண்டு ஒடிசாவின் கந்தமால் பகுதியில் நடைபெற்ற வன்முறையில் தேவாலயங்களும் வீடுகளும் அழிக்கப்பட்டன. ஆயிரக்கணக்கான கிறிஸ்தவர்கள் தங்கள் சொந்த இடங்களிலிருந்து வெளியேற்றப்பட்டனர். தாக்குதல்களுக்கு மத்தியில் பல குடும்பங்கள் தங்கள் கிராமங்களை விட்டு வெளியேற வேண்டிய நிலைக்குத் தள்ளப்பட்டனர். இந்த வன்முறை அப்பகுதி மக்களின் வாழ்வில் ஆழமான காயங்களை ஏற்படுத்தியது.
கட்டக்–புவனேஸ்வர் உயர் மறைமாவட்டத்தின் பேராயராக இருந்தபோது, பேராயர் சீனத் அவர்கள் இந்த நெருக்கடிக்கு திருஅவை அளித்த பதிலில் நெருக்கமாக ஈடுபட்டார். இடம்பெயர்ந்த குடும்பங்களுடன் உடனிருந்து அவர்களுக்கு துணைநின்றார். பாதுகாப்பும் நிவாரணமும் வழங்கப்பட வேண்டும் என்று வலியுறுத்தினார். மேலும், சட்டரீதியான மற்றும் நிறுவனரீதியான வழிமுறைகள் மூலம் நீதியை நிலைநாட்ட தொடர்ந்து முயன்றார்.
அவரது மேய்ப்புப் பணியின் முன்னுரிமையை வெளிப்படுத்தும் வகையில், திருஅவைப் பணியாளர்களிடம் அவர் கூறியதாகக் குறிப்பிடப்படும் வார்த்தைகள்: “முதலில் வீடுகளைக் கட்டுங்கள். தேவாலயங்களைப் பின்னர் கட்டிக்கொள்ளலாம்.” இடம்பெயர்ந்த குடும்பங்களின் வாழ்க்கையையும் மாண்பையும் மீட்டெடுப்பதற்கே முதன்மை அளிக்க வேண்டும் என்பதே இக்கூற்றின் அடிப்படை நோக்கமாக இருந்தது.
வன்முறைக்கு பேராயர் சீனத் அளித்த பதில் பழிவாங்கும் அணுகுமுறையை அடிப்படையாகக் கொண்டதல்ல; மாறாக, பாதிக்கப்பட்ட மக்களுடன் உடனிருந்து அவர்களுக்கு ஆதரவளிக்கும் மேய்ப்புப் பணியாக இருந்தது. துன்புறுத்தலுக்கு உள்ளான மக்களுடன் திருஅவை தொடர்ந்து நிற்க வேண்டும் என்றும், அதே நேரத்தில் நீதியைத் தேடி, மனித கண்ணியத்தைப் பாதுகாக்க வேண்டும் என்றும் அவர் வலியுறுத்தினார்.
அந்தோ அக்கராவின் உரை, கந்தமாலின் வரலாற்றுப் பின்னணியிலும், உயிர் தப்பியவர்கள் தொடர்ந்து எதிர்கொள்ளும் நீதி மற்றும் போதுமான மறுவாழ்வுக்கான போராட்டத்தின் பின்னணியிலும் பேராயர் சீனத் அவர்களின் பணியை எடுத்துக்காட்டியது.
வன்முறைக்கு அவர் அளித்த வெளிப்படையான பதிலுக்காக பேராயர் சீனத் சில நேரங்களில் விமர்சனங்களையும் எதிர்கொண்டார். இருப்பினும், கடுமையான துன்பங்கள் நிலவிய காலகட்டத்தில் பாதிக்கப்பட்ட மக்களுக்காகத் துணிந்து குரல் எழுப்பியதையும், அவர்களின் உரிமைகளுக்காகப் பாடுபட்டதையும் அவரது ஆதரவாளர்கள் அவரது மேய்ப்புப் பொறுப்பின் முக்கிய அம்சமாகக் கருதினர்.
கேரளாவில் பிறந்த பேராயர் சீனத் அவர்கள் தனது பணிக்காலத்தின் பெரும்பகுதியைத் தனது சொந்த மாநிலத்திலிருந்து வெகு தொலைவில் கழித்தார். ஒடிசாவில் அவர் ஆற்றிய பணிக்காலம், வறுமை, இடம்பெயர்வு மற்றும் துன்புறுத்தலை எதிர்கொண்ட மக்களுடன் அவரை நெருக்கமாக இணைத்தது.
அவரை அறிந்த பலருக்கு, வன்முறையால் பாதிக்கப்பட்ட மக்களுடன் வன்முறையின் போதும் அதன் பின்னரும் தொடர்ந்து உடனிருந்த அவரது முடிவே அவரது பணியின் முக்கிய அடையாளமாகத் திகழ்கிறது.
எனவே, அவரது 10ஆம் ஆண்டு நினைவு நிகழ்வு ஒரு திருஅவைத் தலைவரின் வாழ்க்கையை மட்டும் நினைவுகூரும் நிகழ்வாக அமையவில்லை. மாறாக, மக்களின் வாழ்க்கை சிதைக்கப்பட்ட நேரத்தில் அவர்களுடன் உடனிருந்து, அவர்களின் துயரம் மறக்கப்படாமல் இருக்கப் பாடுபட்ட ஒரு மேய்ப்பரை நினைவுகூரும் நிகழ்வாக அமைந்தது.
துன்புறுத்தல் நிலவும் காலங்களில் கிறிஸ்தவத் தலைமையின் பொறுப்பு என்ன என்ற கேள்வியையும் பேராயர் சீனத் அவர்களின் பணிவாழ்வு தொடர்ந்து எழுப்புகிறது: காயமடைந்தவர்களுடன் நெருக்கமாக இருப்பது, மனித மாண்பைப் பாதுகாப்பது, நீதியைத் தேடுவது, நம்பிக்கையிழப்பை எதிர்த்து நிற்பது.
அவர் இறந்து ஒரு தசாப்தம் கடந்துள்ள நிலையிலும், பேராயர் சீனத் அவர்களின் நினைவு கந்தமால் மக்களுடனும், வன்முறை மற்றும் அநீதியால் பாதிக்கப்பட்ட சமூகங்களுடன் துணைநிற்க வேண்டும் என்ற திருஅவையின் தொடர்ச்சியான அழைப்புடனும் நெருக்கமாக இணைந்துள்ளது.
Daily Program
