மாற்றம்பெற்ற இதயங்களே ஒன்றிணைந்த திருஅவையை உருவாக்கும் – FABC பேரவையில் பேராயர் மார்கோ டின் வின் | Veritas Tamil

ஆசிய ஆயர் பேரவைகளின் கூட்டமைப்பின் (FABC) 12ஆவது பேரவைக் கூட்டத்தில் பங்கேற்றிருந்த திருஅவைத் தலைவர்களிடம், இறையருளை ஏற்றுக்கொள்ளும் திறந்த இதயங்களை வளர்த்துக்கொள்ளுமாறு மியான்மரின் பேராயர் மார்கோ டின் வின் அவர்கள் அழைப்பு விடுத்தார். இத்தகைய திறந்த மனப்பான்மையே, ஆசியாவில் நற்செய்தியின் நம்பகமான சாட்சிகளாகவும், மக்களை இணைக்கும் பாலங்களைக் கட்டுவோராகவும் திருஅவையை உருவாக்கும் என்று அவர் வலியுறுத்தினார்.

ஜூலை 23 அன்று இந்தோனேசியாவின் ஜகார்த்தாவில் உள்ள ஹோட்டல் முலியாவில் இடம்பெற்ற FABC பேரவைக் கூட்டத்தின் நான்காம் நாள் திருப்பலியில் மறையுரை ஆற்றியபோது அவர் இக்கருத்துகளைப் பகிர்ந்துகொண்டார்.

இந்தத் திருப்பலிக்கு மியான்மரின் பேராயர் மார்கோ டின் வின் அவர்கள் தலைமையேற்று நிறைவேற்றினார். அவருடன், பாகிஸ்தானின் பேராயர் காலித் ரெஹ்மத் மற்றும் தைவானின் ஆயர் ஜான் பாப்டிஸ்ட் லீ கே-மியென் ஆகியோர் இணைந்து திருவழிபாட்டை நிறைவேற்றினர். மேலும், பேரவையில் பங்கேற்ற கர்தினால்கள், ஆயர்கள் மற்றும் அருள்பணியாளர்களும் இணைந்து திருப்பலியை நிறைவேற்றினர்.

மத்தேயு நற்செய்தி 13ஆம் அதிகாரத்தில் இடம்பெறும், "ஏன் மக்களிடம் உவமைகளால் பேசுகிறீர்?" என்ற சீடர்களின் கேள்வியை அடிப்படையாகக் கொண்டு தனது மறையுரையைத் தொடங்கிய பேராயர், இயேசு உவமைகளை வெறும் கற்பித்தல் முறையாகப் பயன்படுத்தவில்லை; மாறாக, இறையாட்சியின் மறைபொருளுக்குள் மக்களை அழைத்துச் செல்லும் வழியாகவே அவற்றைப் பயன்படுத்தினார் என்று விளக்கினார்.

"உவமைகள் மனித இதயத்தைத் தொடுவதன் மூலம் இறையுண்மையை வெளிப்படுத்துகின்றன. பல நேரங்களில் ஒரு கதை, ஆழமான பகுப்பாய்வைவிட அதிக தாக்கத்தை ஏற்படுத்துகிறது; அது கேட்போரின் நினைவில் நீண்ட காலம் நிலைத்திருக்கும்," என்று அவர் கூறினார்.

நற்செய்தியில் கூறப்படும் 'காணுதல்' மற்றும் 'கேட்டல்' என்பது வெறும் உடலின் கண்களாலும் காதுகளாலும் நிகழ்வதல்ல என்று அவர் வலியுறுத்தினார். மாறாக, இறையருளை ஏற்றுக்கொள்ளும் இதயமே அதற்கான அடிப்படை என்று குறிப்பிட்டார்.

"காணுவதும், கேட்பதும், புரிந்துகொள்வதும் இறையருளோடு ஒன்றிணைந்த திறந்த இதயத்தை வேண்டுகின்றன. இறையருளோடு இணைந்த இதயத்தைக் கொண்டவரின் மனம், வாழ்க்கையை இறைவனின் பார்வையில் காணும் திறனைப் பெறுகிறது," என்று அவர் எடுத்துரைத்தார்.

பரிசுத்த ஆவியின் உயர்ந்த கொடைகளில் ஒன்றான ஞானம், அறிவைப் பெறுவதற்காக மட்டுமல்ல; இறையுண்மையை ஆழமாகப் புரிந்துகொண்டு, இறைவார்த்தை வாழ்வை மாற்ற அனுமதிக்கும் அருளாகும் என்றும் அவர் கூறினார்.

இயேசுவின் உவமைகளை "புனிதமான மறைப்புத் திரைகள்" என வர்ணித்த பேராயர், அவை இறைமறைபொருளை ஒருபுறம் மறைத்தும் மறுபுறம் வெளிப்படுத்தியும் செயல்படுகின்றன என்றார். உண்மையைத் தாழ்மையுடன் தேடுபவர்களுக்கு அவை இறைவனின் இதயத்தை நோக்கிச் செல்லும் சாளரங்களாக அமைகின்றன; இதயத்தை மூடிக்கொண்டிருப்போருக்கு அவை ஆழமான மனமாற்றத்திற்கான அழைப்பாக மாறுகின்றன என்றும் விளக்கினார்.

நற்செய்தியில் இயேசு மேற்கோள் காட்டும் இறைவாக்கினர் எசாயாவின் வார்த்தைகளை நினைவுகூர்ந்த அவர், மனிதர்களின் இதயம் ஆன்மிக உணர்வை இழக்கக்கூடும் என்றாலும், கிறிஸ்து ஒருபோதும் இறைவார்த்தை என்னும் விதையை விதைப்பதை நிறுத்துவதில்லை என்று கூறினார்.

"இயேசு யாரையும் குற்றம் சாட்டவில்லை; அவர் வேதனைப்படுகிறார். இருப்பினும் அவர் ஒருபோதும் கைவிடுவதில்லை. நிலம் எவ்வளவு கடினமாக இருந்தாலும், ஒவ்வொரு இதயத்திலும் தமது வார்த்தை என்னும் விதையை தொடர்ந்து விதைத்துக்கொண்டே இருக்கிறார்," என்று பேராயர் மார்கோ டின் வின் அவர்கள் கூறினார்.

அவரது மறையுரை, ஒன்றிணைந்த மனமாற்றம் மற்றும் ஆசியாவில் பாலங்களைக் கட்டும் திருஅவையின் மறைப்பணி என்ற FABC பேரவையின் மையக் கருத்துடன் ஒத்திசைந்ததாக அமைந்தது. இந்தப் பணி திட்டங்கள் அல்லது நிர்வாக அமைப்புகளால் தொடங்குவதில்லை; மாறாக, இறையருளால் மாற்றப்பட்டு, இறைவார்த்தைக்குச் செவிசாய்க்கும் இதயங்களிலிருந்தே தொடங்குகிறது என்று அவர் சுட்டிக்காட்டினார்.

இந்த ஆன்மிகச் சிந்தனை, அன்றைய பேரவைக் கூட்டங்களுக்கும் திசையமைத்தது. அன்றைய அமர்வுகளில், பிராக் நகரிலுள்ள சார்ல்ஸ் பல்கலைக்கழகத்தின் சமூகவியல் பேராசிரியர் பேரருள்திரு தோமாஷ் ஹாலிக் அவர்கள், உலகளாவிய புவிசார் அரசியல் மாற்றங்கள் குறித்து உரையாற்றினார். தொடர்ந்து, மலாயா பல்கலைக்கழகத்தின் தென்கிழக்காசிய ஆய்வுத்துறையின் விரிவுரையாளரான முனைவர் சூங் புய் யீ அவர்கள், ஆசியாவின் மாறிவரும் சமூகச் சூழல்களையும், உரையாடல், நல்லிணக்கம் மற்றும் ஒன்றிப்பை மையமாகக் கொண்ட மறைப்பணி மாமன்ற சமூகமாகத் திருஅவை உருவாக வேண்டிய அழைப்பையும் எடுத்துரைத்தார்.