இறைவார்த்தையிலிருந்தே ஆசியத் திருஅவையின் ஒன்றிணைந்த புதுப்பிப்பு தொடங்க வேண்டும் – அருள்பணி யான் ஜே. ஸ்டெஃபனோவ் | FABC | Veritas Tamil

ஆசிய ஆயர் பேரவைகளின் கூட்டமைப்பின் (FABC) 12ஆவது பேரவைக் கூட்டத்தில் உரையாற்றிய கத்தோலிக்க விவிலியக் கூட்டமைப்பின் (Catholic Biblical Federation - CBF) பொதுச் செயலாளர் அருள்பணி யான் ஜே. ஸ்டெஃபனோவ், SVD, ஆசியாவில் திருஅவையின் ஒன்றிணைந்த புதுப்பிப்பு புதிய கட்டமைப்புகள் அல்லது புதிய அருள்பணித் திட்டங்களால் அல்ல; மாறாக, இறைவார்த்தையுடனான ஆழமான சந்திப்பிலிருந்தே தொடங்க வேண்டும் என்று வலியுறுத்தினார்.

ஜூலை 22 அன்று இந்தோனேசியாவின் ஜகார்த்தாவில் உள்ள ஹோட்டல் முலியாவில் இடம்பெற்ற FABC-யின் 12ஆவது பேரவைக் கூட்டத்தில் உரையாற்றிய அவர், ஆசியாவில் பாலங்களையும் பாலங்களை உருவாக்குபவர்களாகவும் திருஅவை செயல்பட வேண்டுமெனில், அதன் அடித்தளம் திருவிவிலியமாக இருக்க வேண்டும் என்று கூறினார்.

"ஒன்றிணைந்த மனமாற்றமும், ஆசியாவில் பாலங்களாகவும் பாலங்களை உருவாக்குபவர்களாகவும் இருப்பதற்கான மறைப்பணியும்" என்ற கருப்பொருளில் நடைபெற்ற இந்தப் பேரவையில், ஆசியாவின் பல்வேறு நாடுகளைச் சேர்ந்த கர்தினால்கள், ஆயர்கள், அருள்பணியாளர்கள், துறவியர் மற்றும் பொதுநிலையினர் பங்கேற்றனர்.

இறைவன் ஏற்கனவே உருவாக்கிய அடிப்படைப் பாலத்தின் மீதே திருஅவை உருவாக்கும் அனைத்து பாலங்களும் அமைகின்றன என்று அருள்பணி ஸ்டெஃபனோவ் அவர்கள் குறிப்பிட்டார்.

"திருமறை என்பது விண்ணுக்கும் மண்ணுக்கும் இடையில் இறைவன் அமைத்த முதல் பாலமாகும். மக்களுடனும், பண்பாடுகளுடனும், சமயங்களுடனும் திருஅவை அமைக்கும் ஒவ்வொரு பாலமும் , அந்த முதல் பாலமான இறைவார்த்தையின் மீதே கட்டமைக்கப்படுகிறது," என்று அவர் கூறினார்.

ஒன்றிணைந்த பயணம் என்பது திருஅவையை நிர்வகிக்கும் புதிய முறை அல்லது முடிவெடுக்கும் புதிய நடைமுறை மட்டுமல்ல என்றும், அது முதலில் திருமறையின் வழியாகப் பேசும் இறைவனின் குரலைக் கேட்பதிலிருந்தே தொடங்குகிறது என்றும் அவர் வலியுறுத்தினார்.

ஒன்றிணைந்த பயணம் குறித்த இறுதி ஆவணத்தை மேற்கோள்காட்டிய அவர், "இறைவார்த்தைக்குச் செவிசாய்ப்பதே, திருஅவையின் முழுமையான பகுத்தறிதல் பயணத்தின் தொடக்கமும் அளவுகோலும் ஆகும்" என்றார்.

"ஒன்றிணைந்த பயணம் இறைவார்த்தையிலிருந்து தொடங்கவில்லை என்றால், அது தனது அடித்தளத்தை இழந்துவிடும். செவிமடுத்தல் இல்லாமல் மாமன்றப் பயணம் இல்லை; இறைவார்த்தைக்குச் செவிமடுக்காமல் உண்மையாகச் செவிமடுக்கும் திருஅவையும் இருக்க முடியாது," என்று அவர் கூறினார்.

திருவழிபாடு, திருஅவையின் உயிருள்ள மரபு, திருமறையை மையமாகக் கொண்ட செபம், மக்களின் இறைபக்தி மரபுகள், ஏழைகளின் குரல், வரலாற்று நிகழ்வுகள், படைப்பு உலகம் மற்றும் மனித மனசாட்சி ஆகிய பல வழிகளின் மூலமாக இறைவன் தொடர்ந்து பேசுகிறார் என்றும், இவை அனைத்திற்கும் ஆதாரமாக இருப்பது இறைவார்த்தையே என்றும் அவர் குறிப்பிட்டார்.

ஆசியத் திருஅவையில் விவிலிய மறைப்பணிக்கு புத்துயிர் அளிக்க வேண்டிய அவசியத்தையும் அவர் எடுத்துரைத்தார். FABC தனது அருள்பணிக் கண்ணோட்டத்தில் திருவிவிலியத்திற்கு எப்போதும் மைய இடம் அளித்துள்ளது என்றும் அவர் நினைவுகூர்ந்தார்.

அந்த அர்ப்பணிப்பின் விளைவாக, விவிலிய மறைப்பணிக்கான ஆயர்களின் நிறுவனம் (Bishops' Institute for the Biblical Apostolate - BIBA) உருவாக்கப்பட்டது. இந்த நிறுவனம் பல தசாப்தங்களாக கத்தோலிக்க விவிலியக் கூட்டமைப்புடன் இணைந்து, ஆசியா முழுவதும் விவிலியப் பயிற்சியை வலுப்படுத்தி வருகிறது என்றும் அவர் கூறினார்.

1999-ஆம் ஆண்டு மலேசியாவில் நடைபெற்ற BIBA II, ஆசியாவின் மிக விரிவான விவிலியப் பயிற்சி முயற்சிகளில் ஒன்றாக இருந்ததாகவும், அதைத் தொடர்ந்து BIBA III (2010) மற்றும் BIBA IV (2013) நடைபெற்றதாகவும் அவர் குறிப்பிட்டார்.

கடந்த பத்தாண்டுகளில் விவிலிய மறைப்பணியின் வேகம் ஓரளவு குறைந்திருந்தாலும், இந்த FABC பேரவைக் கூட்டம் அந்த அர்ப்பணிப்பை மீண்டும் புதுப்பிப்பதற்கான அரிய வாய்ப்பாக அமையும் என்ற நம்பிக்கையை அவர் வெளிப்படுத்தினார்.

"எதுவும் உண்மையில் இழக்கப்படவில்லை. அந்த வளமான மரபு இன்னும் நம்மிடையே உள்ளது. ஆனால் ஒரு காலத்தில் இருந்த உயிர்த்துடிப்பும் ஆற்றலும் மீண்டும் பற்றவைக்கப்படுவதற்காக காத்திருக்கிறது," என்று அவர் கூறினார்.

தான் முன்வைப்பது இன்னொரு புதிய அருள்பணித் திட்டம் அல்ல என்றும், மாறாக திருஅவையின் அனைத்து அருள்பணிகளுக்கும் திருவிவிலியமே ஊக்கமூட்டும் ஆதாரமாக அமைய வேண்டும் என்பதே தனது விருப்பம் என்றும், திருத்தந்தை பதினாறாம் பெனடிக்ட் அவர்களின் Verbum Domini திருத்தூது மடலை மேற்கோள் காட்டி அவர் விளக்கினார்.

"திருமறை, திருஅவையின் முழு அருள்பணி வாழ்விற்கும் ஊக்கமூட்டும் மூலாதாரமாக மாற வேண்டும்," என்று அவர் வலியுறுத்தினார்.

திருமறையை வாசிக்கவும், திறந்த இதயத்துடன் இறைவார்த்தைக்குச் செவிமடுக்கவும், ஒன்றிணைந்து பகுத்தறியவும் பயிற்சி பெற்ற பெண்களும் ஆண்களும் ஆசியத் திருஅவைக்கு அதிகமாகத் தேவைப்படுகின்றனர் என்றும், இத்தகைய உருவாக்கமே மாமன்ற மனமாற்றத்தை நிலைநிறுத்த அத்தியாவசியமானது என்றும் அவர் கூறினார்.

கத்தோலிக்க விவிலியக் கூட்டமைப்பு தனது உலகளாவிய வலையமைப்பு, பயிற்சி வளங்கள் மற்றும் ஒத்துழைப்பின் மூலம் ஆசியத் திருஅவைகளுக்கு தொடர்ந்து ஆதரவளிக்கத் தயாராக இருப்பதாகவும் அவர் உறுதியளித்தார்.

தனது உரையின் நிறைவில், திருஅவை நாடும் புதுப்பிப்பு நிர்வாகச் சீர்திருத்தங்களால் அளவிடப்படுவதில்லை; மாறாக, இறைவார்த்தையால் மாற்றமடைந்த இதயங்களால்தான் அது அளவிடப்படுகிறது என்று அருள்பணி யான் ஜே. ஸ்டெஃபனோவ் அவர்கள் வலியுறுத்தினார்.

அத்தகைய உறுதியான அடித்தளத்திலிருந்தே திருஅவை இறைவனின் திருவுளத்தைப் பகுத்தறிந்து, விசுவாசத்தில் ஒன்றிணைந்து நடந்து, ஆசியா முழுவதும் நம்பிக்கையின் பாலமாகத் தனது மறைப்பணியை நிறைவேற்ற முடியும் என்றும் அவர் எடுத்துரைத்தார்