வியட்நாமைச் சேர்ந்த புகைப்படக் கலைஞர் அந்தோணி பாம் தன் டான் (Anthony Phạm Tân), சாதாரண மக்களின் வாழ்வு, இறைவேண்டல் மற்றும் வழிபாட்டு நிகழ்வுகள் வழியாகக் கத்தோலிக்கத் திருஅவையின் வாழ்வியலைத் தனது புகைப்படங்களில் ஆவணப்படுத்தி வருகிறார். அதோடு, இளைஞர்களுக்கும் திருஅவைச் சமூகங்களுக்கும் புகைப்படம் மற்றும் ஊடகத் திறன்களைக் கற்பித்து வருகிறார்.
வடக்கு வியட்நாமில் உள்ள புய் சூ மறைமாவட்டத்தின் சா சாவ் பங்கில் பிறந்த அந்தோணி பாம் தன் டான், தற்போது ஹனோய் நகரில் வசித்து வருகிறார். அங்கு மறைமாவட்டத்தின் ஊடகப் பணிகளுக்கும் கத்தோலிக்கப் புகைப்படக் கலைஞர்களின் செயல்பாடுகளுக்கும் அவர் பங்களித்து வருகிறார்.
அவரது புகைப்படப் பணியின் சிறப்பம்சம், நம்பிக்கையின் உண்மையான வெளிப்பாடுகளைப் பதிவு செய்வதாகும். அதிகாலைப் பொழுதிலேயே ஆலயத்திற்கு வரும் முதியவர்கள், கையில் செபமாலை ஏந்தி இறைவேண்டலில் ஈடுபடுபவர்கள், திருப்பலியிலும் வழிபாட்டு நிகழ்வுகளிலும் பங்கேற்கும் இறைமக்கள் என அன்றாட வாழ்வின் எளிய தருணங்களுக்கு அவர் முக்கியத்துவம் அளிக்கிறார்.
தொடக்கத்தில் திரைப்படச் சுருள் (Film) புகைப்பட முறையில் தனது பயணத்தைத் தொடங்கிய அந்தோணி, பின்னர் கத்தோலிக்கத் திருஅவையின் வாழ்வியலை ஆவணப்படுத்துவதில் தனி ஆர்வம் கொண்டார். புகைப்படங்கள் என்பவை வெறும் காட்சிப் பதிவுகள் மட்டுமல்ல; அவை மனிதர்களுடனான சந்திப்புகளையும், நம்பிக்கையின் அனுபவங்களையும் எதிர்காலத் தலைமுறைகளுக்காகப் பாதுகாக்கும் கருவிகள் என அவர் கருதுகிறார்.
காலப்போக்கில் மறைந்துபோகக்கூடிய எளிய தருணங்களையும், மக்களின் வாழ்வில் இறைநம்பிக்கை வெளிப்படும் விதங்களையும் புகைப்படங்கள் மூலம் நிலைநிறுத்த முடியும் என்பது அவரது பணியின் அடிப்படை நோக்கமாக உள்ளது.புகைப்படம் எடுப்பதோடு மட்டும் நின்றுவிடாமல், வடக்கு வியட்நாமில் உள்ள பல்வேறு திருஅவைச் சமூகங்களுக்கு ஊடகப் பயிற்சிகளையும் தொழில்நுட்ப உதவிகளையும் அந்தோணி வழங்கி வருகிறார்.
பாக் நின்ஹ் மற்றும் புய் சூ மறைமாவட்டங்களில் உள்ள ஊடகக் குழுக்களுக்குப் பயிற்சி அளித்தல், அவர்களுடன் இணைந்து பணியாற்றுதல், ஹனோய் நகரிலுள்ள புனித பேதுரு லே துய் இறையியல் நிறுவனத்தில் ஊடகப் பணிகளுக்கு உதவுதல் ஆகியவை அவரது சேவைகளில் அடங்கும்.
மேலும், வியட்நாமில் நடைபெற்ற பாத்திமா அன்னையின் திருப்பயணத் திருச்சுரூபத்தின் பயண நிகழ்வுகள் உள்ளிட்ட முக்கியமான திருஅவை நிகழ்வுகளையும் அவர் புகைப்படங்களாக ஆவணப்படுத்தியுள்ளார்.2022ஆம் ஆண்டு, ஹனோய் நகரிலுள்ள புனித யோசேப்பு பேராலயத்தில் *“அன்னையின் தாயன்பின் பெருவெள்ளம்”* (The Shower of Motherly Love) என்ற பெயரில் ஒரு தொண்டு நோக்கிலான புகைப்படக் கண்காட்சியை அந்தோணி ஏற்பாடு செய்தார்.
அக்கண்காட்சியில் விற்பனை செய்யப்பட்ட புகைப்படங்களின் மூலம் கிடைத்த வருமானம், தொலைதூர மலைப்பகுதிகளில் வாழும் ஏழைக் குடும்பங்களைச் சேர்ந்த குழந்தைகளுக்கு உதவுவதற்காக வழங்கப்பட்டது. இவ்வாறு, புகைப்படக் கலையைத் தனது படைப்பாற்றலின் வெளிப்பாடாக மட்டுமல்லாமல், பிறருக்கு உதவும் கருணைப் பணிக்கான வழியாகவும் அவர் பயன்படுத்தினார்.
ஆவணப்படப் புகைப்படம், ஊடகப் பயிற்சி மற்றும் தொண்டு முயற்சிகள் எனப் பல்வேறு தளங்களில் அவர் பணியாற்றி வருகிறார். இருப்பினும், சுயதொழில் புகைப்படக் கலைஞராக இருப்பதால் வருமானம் தொடர்பான நிச்சயமற்ற சூழல்களையும் அவர் எதிர்கொள்கிறார். இத்தகைய சவால்களுக்கு மத்தியிலும், வழிபாட்டு நிகழ்வுகளின் புனிதத்தன்மையை மதித்தும், மக்களின் வாழ்வை உண்மைத்தன்மையுடன் பதிவு செய்தும் தனது பணியைத் தொடர்ந்து வருகிறார்.
“மிக அழகான புகைப்படங்களைத் தேடுவதில்லை; மிகவும் உண்மையான தருணங்களையே தேடுகிறேன்” என்று அந்தோணி பாம் தன் டான் கூறுகிறார்.
மேலும், “என்னைப் பொறுத்தவரை, புகைப்படம் என்பது ஒளி, கேமரா அல்லது தொழில்நுட்பம் சார்ந்தது மட்டுமல்ல. நாம் யாரைச் சந்தித்தோம், எவற்றைக் கண்டோம், நாளைய தலைமுறைக்காக எவற்றைப் பாதுகாத்தோம் என்பதுதான் அதன் உண்மையான பொருள்” என்றும் அவர் குறிப்பிடுகிறார்.
வியட்நாமின் உள்ளூர் திருஅவைச் சமூகங்களின் வழிபாடுகள், அன்றாட நம்பிக்கை அனுபவங்கள் மற்றும் மனித உறவுகளைப் புகைப்படங்களாகப் பதிவு செய்வதன் வழியாக, அந்தோணி பாம் தன் டான் திருஅவையின் காட்சி ஆவணங்களை உருவாக்குவதில் பங்களித்து வருகிறார்.
Daily Program
