FABC பேரவையில் உறவுகளை மையப்படுத்திய மறைப்பணியை வலியுறுத்திய மிசியோ மியூனிக் | FABC \ Veritas Tamil

அனைத்துலக் கூட்டாண்மைகள் நிதியுதவி அல்லது கூட்டுத் திட்டங்களால் மட்டுமல்ல; மாறாக, ஒருவர் மற்றவருக்கு செவிமெடுப்பது, ஒருவர் மற்றவரிடமிருந்து கற்றுக்கொள்வது மற்றும் ஒரே உலகளாவிய திருஅவையாக இணைந்து பயணிக்கத் தயாராக இருப்பது ஆகியவற்றின் அடிப்படையில் உருவாகும் தனிப்பட்ட உறவுகளால்தான் செழித்து வளர்கின்றன.

இந்தக் கருத்தை ஜூலை 23 அன்று ஜகார்த்தாவில் உள்ள ஹோட்டல் முலியாவில் நடைபெற்ற ஆசிய ஆயர் பேரவைகளின் கூட்டமைப்பின் (FABC) 12ஆவது பேரவையில், மிசியோ மியூனிக்கின் (Missio Munich) ஆசியத் திட்ட மேலாளர் திருமதி பிராங்கா பெகிச் (Branka Begic) அவர்கள் வலியுறுத்தினார்.

ஜெர்மனியில் திருத்தந்தையரால் அங்கீகரிக்கப்பட்ட மறைத்தூது கழகங்களின் (Pontifical Mission Societies) இரு கிளைகளில் ஒன்றான மிசியோ மியூனிக்கை பிரதிநிதித்துவப்படுத்திய அவர், கடந்த மூன்று தசாப்தங்களாக ஆசியா முழுவதும் திருஅவையின் பல்வேறு பணிகளுடன் இணைந்து பயணித்த அனுபவத்தைப் பகிர்ந்து கொண்டார். FABC பேரவையில் பங்கேற்பது இதுவே முதல் முறை என்றாலும், ஆசியத் திருஅவையின் உயிரோட்டத்தை நீண்டகாலமாகக் கண்டு வருவதாக அவர் தெரிவித்தார்.

"ஒன்றிணைந்த மனமாற்றத்திற்கான அழைப்பும், ஆசியாவில் பாலங்களையும் பாலம் அமைப்பவர்களாக இருப்பதற்கான மறைப்பணியும்" என்ற கருப்பொருளில் நடைபெற்ற வாரம் முழுவதும் நீண்ட பேரவையின் போது அவர் இக்கருத்துகளைப் பகிர்ந்து கொண்டார்.

தனது அனுபவத்தின் அடிப்படையில், உள்ளூர் சமூகங்களுடனான நெருக்கம், உரையாடலுக்கான அர்ப்பணிப்பு மற்றும் துடிப்பான மேய்ப்புப்பணி ஆகியவற்றின் மூலம் ஆசியத் திருஅவை தொடர்ந்து உலகிற்கு ஊக்கமளித்து வருவதாக பெகிச் அவர்கள் கூறினார்.

"பல ஆண்டுகளாக, ஆசியத் திருஅவை பாலங்களை அமைத்து, அர்த்தமுள்ள உரையாடலை வளர்த்து, ஏராளமான மக்களுக்கு உண்மையான நம்பிக்கையை அளித்து வருவதை நாங்கள் கண்டு வருகிறோம். உள்ளூர் திருஅவைகளின் மேய்ப்புப்பணித் தலைமையும் அர்ப்பணிப்பும் இந்த 'பெரிய செயல்களை' நனவாக்கியுள்ளன," என்று அவர் கூறினார்.

ஆசியா முழுவதும் மிசியோ மியூனிக் ஆதரவு அளித்த பல வெற்றிகரமான திட்டங்களைப் பாராட்டிய அவர், உண்மையான கூட்டாண்மை என்பது நிர்வாக ஒத்துழைப்பு அல்லது நிதி உதவியைத் தாண்டியதாகும் என்று வலியுறுத்தினார்.

"மிசியோ மியூனிக்கைப் பொறுத்தவரை, தனிப்பட்ட உறவுகள் மிகவும் முக்கியமானவை. நாங்கள் ஒற்றுமையை வெளிப்படுத்த மட்டுமல்ல; அதைவிட முக்கியமாக, "உங்களுக்குச் செவிமடுத்து, உங்களிடமிருந்து கற்றுக்கொள்ளவே நாங்கள் விரும்புகிறோம்," என்றார்.

உலகளாவிய திருஅவையை நன்கொடையாளர்களுக்கும் உதவி பெறுவோருக்கும் இடையிலான உறவாக ஒருபோதும் புரிந்துகொள்ளக் கூடாது என்று அவர் வலியுறுத்தினார். மாறாக, ஒவ்வொரு உள்ளூர் திருஅவையும் உலகளாவிய கத்தோலிக்க சமூகத்தை வளப்படுத்தும் தனித்துவமான கொடைகள், அனுபவங்கள் மற்றும் விசுவாச மரபுகளைக் கொண்டுள்ளது என்றார்.

"உலகளாவிய திருஅவையில் உள்ள கூட்டாண்மை என்பது, கிறிஸ்துவில் சகோதரர், சகோதரிகளாக இரு தரப்பினரும் வழங்குவதற்கும் பெற்றுக்கொள்வதற்கும் ஏதோ ஒன்றைக் கொண்டிருக்கும் உறவாகும்," என்று அவர் கூறினார்.

ஆசியாவில் மேய்ப்புப்பணித் திட்டங்களுக்கு ஆதரவளிப்பதோடு மட்டுமல்லாமல், ஆசியத் திருஅவைகளின் அனுபவங்களை ஜெர்மனிய கத்தோலிக்கர்களுடன் பகிர்ந்து கொள்ளவும் மிசியோ மியூனிக் விரும்புகிறது என்று பெகிச் அவர்கள் விளக்கினார். இதன் மூலம், ஜெர்மனிய கத்தோலிக்கர்கள் ஆசியத் திருஅவையின் உயிரோட்டம், சவால்கள் மற்றும் சாட்சிய வாழ்வு குறித்து ஆழமான புரிதலைப் பெறுகின்றனர் என்றார்.

மிசியோ மியூனிக் பெரிய அமைப்பு அல்ல என்றாலும், நம்பிக்கையையும் தனிப்பட்ட உறவுகளையும் அடிப்படையாகக் கொண்ட கூட்டாண்மைகள், நிறுவனக் கட்டமைப்புகளை மட்டுமே சார்ந்திருக்கும் கூட்டாண்மைகளை விட நீடித்த பலன்களை அளிக்கின்றன என்றும் அவர் கூறினார்.

அவரது கருத்துகள், FABC பேரவையில் தொடர்ந்து வலியுறுத்தப்பட்ட முக்கியக் கருத்துகளில் ஒன்றை எதிரொலித்தன. அதாவது, உரையாடல், பங்கேற்பு மற்றும் ஒருவருக்கொருவர் மரியாதை செலுத்தும் உறவுகளின் வழியாகவே ஒன்றிணைந்த பயணம் நடைமுறையில் வெளிப்படுகிறது என்பதாகும்.

ஆசியத் திருஅவை தனது ஒன்றிணைந்த பயணத்தைத் தொடர்ந்து முன்னெடுத்து வரும் நிலையில், பல்வேறு பண்பாடுகள் மற்றும் கண்டங்களைச் சேர்ந்த மக்கள் ஒருவரையொருவர் கவனமாகக் கேட்பது, பாலங்களை அமைக்கும் திருஅவையின் மறைப்பணியை நிறைவேற்றுவதற்கு இன்றியமையாதது என்றும் அவர் குறிப்பிட்டார்.

இறுதியாக, FABC வழியாக உருவாகியுள்ள கூட்டாண்மைகள், உள்ளூர் திருஅவைகளுக்கும் அனைத்துலக  மறைப்பணி அமைப்புகளுக்கும் இடையேயான ஒன்றிப்பை மேலும் ஆழப்படுத்தி, விசுவாசத்தைப் பகிர்ந்து கொள்ளவும், ஒருவரிடமிருந்து ஒருவர் கற்றுக்கொள்ளவும், ஆசியா முழுவதும் திருஅவையின் பொதுவான மறைப்பணியை முன்னெடுக்கவும் புதிய வாய்ப்புகளை உருவாக்கும் என்ற நம்பிக்கையை அவர் வெளிப்படுத்தினார்.

ஜெர்மனியின் மியூனிக் நகரில் நிறுவப்பட்ட மிசியோ மியூனிக், மேய்ப்புப்பணி உருவாக்கம், நற்செய்தி அறிவிப்பு மற்றும் உள்ளூர் திருஅவைகளுடன் ஒற்றுமையை வளர்த்தல் ஆகியவற்றின் மூலம் உலகளாவிய திருஅவையின் மறைப்பணிக்கு ஆதரவளித்து வருகிறது. ஜெர்மனியின் திருத்தந்தையரால் அங்கீகரிக்கப்பட்ட மறைத்தூது கழகங்களில் ஒன்றான இந்நிறுவனம், ஒருவர்மீது ஒருவர் கொண்ட நம்பிக்கை, பகிர்ந்த பொறுப்புணர்வு மற்றும் உள்ளூர் திருஅவைகளின் தலைமையை மதிக்கும் மனப்பான்மை ஆகியவற்றின் அடிப்படையில் கூட்டாண்மைகளை ஊக்குவித்து வருகிறது.