நோம்புக்கஞ்சி
எங்கவூர்ல முஸ்லீம் மாருங்க
ரம்ஜான எதிர்பார்ப்பாங்களோ இல்லையோ
நாங்க எதிர்பார்த்து
காத்துக்கொண்டேதானிருப்போம்
பாய்க வீட்டுப் பிரியாணி கூட
அழைப்பிருந்தால் மட்டுமே
நாவு சுவைக்கும்
ஆனால் நோம்புக் கஞ்சிக்கு
அப்படியொரு வகைமையெல்லாம்
எப்போதும் கெடையாது
பச்சரிசி ருசியோடும்
ஏலம் இலவங்க மணத்தோடும்
அன்பான குணத்தோடு
ஊத்துவாக நம்மூரு பாய் மாருங்க
சாதி மதத்தையெல்லாம்
பள்ளிவாச வாசலிலேயே கலட்டி விட்டு
நேரான வரிசையில்
கையில் போசியோடும்
தீராத பசியோடும் காத்திருந்து வாங்கி வருவோம்
பள்ளிக்கூடக் குழந்தைகளும்
வயசான முதியோருந்தான்
கூட்ட எண்ணிக்கையில அதிகமாகயிருக்கும்
அதில்லாம தாய்மாரென்றால்
வரிசையில் முன்னுரிமையும் உண்டு
ரம்ஜான் மாசத்துல
பள்ளி வாசலச் சுத்திலும்
வடை பஜ்ஜிக் கடைகள் நிறைந்திருக்கும்
ஊருத் தெருவிற்குள்ளாரயும்
பலகார விற்பனை
படு ஜோராகப் போகும்
"வடைய ஒரு கடிக் கடிச்சிக்கிட்டு
நோம்புக் கஞ்சிய குடிச்சோமுண்டா
அட நாமதான் குடிச்சோமா
ஒரு போசிக் கஞ்சியையும்!" என வியந்து
வயிற்றைப் பார்த்து
உறுதிபடுத்திக்கொள்ளலாம்
இருபத்தி ஏழாம் நாள்
வயிறுத் தானாவே
அளவுல கொஞ்சம் பெருத்துக்கும்
ஏன்னா பிரியாணி கஞ்சி ஊத்துவாங்கனு
மூக்கு வேர்த்துக்கிட்டு
முன் சாய்ந்தரமே
கூட்டம் கூடிக் கெடப்போம்
இந்த ரம்ஜான் மாசத்துல
எங்கவூர் ஏழைகள் பலருக்கும்
ராத்திரி நேரச் சாப்பாடே
நோம்புக் கஞ்சியாத்தானிருக்கும்
அதனாலயே என்னவோ
ரம்ஜான் முஸ்லீம் பண்டிகையா
எங்கவூருல ஒருபோதும் தெரிஞ்சதில்ல
அதுவொரு ஊர்ப் பண்டிகையா
ஏழைகளின் பசி போக்கும் பண்டிகைதான்
இப்போது வரைத் தெரியுது.
சாமானியன்
ஞா சிங்கராயர் சாமி
கோவில்பட்டி
Daily Program
