வாழ்க்கையைச் சந்திப்பதற்கும் வாழ்க்கையில் சந்திப்பதற்கும்
நிறைய வேறுபாடிருக்கிறது
வாழ்க்கையைச் சந்தித்தல் வரம்
வாழ்க்கையில் சந்தித்தல் தவம்
மொத்தத்தில்
இந்தப் பெரு வாழ்வு
வரத்தையும் தவத்தையும்
கொடுத்துக் கொண்டேதான் இருக்கிறது
வாழ்க்கையைச் சந்திக்கும் போது
மொத்தமாயும்
வாழ்க்கையில் சந்திக்கும் போது
தனித்தனியாயும்
நம்மை பழக்கிக்கொண்டது நம் பிழை.
வாழ்க்கையைச் சந்திக்கும் போது
இன்பமாயும்
வாழ்க்கையில் சந்திக்கும் போது
துன்பமாயும்.
இன்னும்
இலகுவாய் சொல்வதென்றால்
வரமெது தவமெது
என கடைசிவரை தெரியாமல்தான்
ஆளாளுக்கு
இந்த வாழ்வை
பந்தாடிக் கொண்டிருக்கிறோம்.
---சாமானியன்
ஞா சிங்கராயர் சாமி
கோவில்பட்டி
Daily Program
