திருத்தந்தை பதினான்காம் லியோ அவர்களுக்கு, நுரையீரலில் கண்டறியப்பட்ட உள்ளூர்மயமாக்கப்பட்ட கட்டியை அகற்றுவதற்காக, உரோம் நகரிலுள்ள ஜெமெல்லி மருத்துவமனையில் அக்டோபர் 13ஆம் தேதி வெற்றிகரமான அறுவை சிகிச்சை மேற்கொள்ளப்பட்டது. திருத்தந்தையின் வலது நுரையீரலின் கீழ்ப்பகுதி அறுவை சிகிச்சை மூலம் அகற்றப்பட்டதாக, திருப்பீடச் செய்தித் தொடர்பகம் வெளியிட்ட மருத்துவ அறிக்கை தெரிவித்துள்ளது.
முன்னதாகத் திட்டமிடப்பட்டபடி நடைபெற்ற இந்த அறுவை சிகிச்சைக் குழுவிற்கு, மார்பு அறுவை சிகிச்சைப் பிரிவின் தலைவர் பேராசிரியர் ஸ்டெஃபானோ மார்கரிட்டோரா தலைமை தாங்கினார். கேமராவின் உதவியுடன் அறுவை சிகிச்சை மேற்கொள்ளும் காணொளி உதவித் தொழில்நுட்பம் (Video-Assisted Technique) இச்சிகிச்சையில் பயன்படுத்தப்பட்டது.
நுரையீரல் சுரப்பிச் செல்களில் உருவாகும் புற்றுநோய் வகையே ‘லங் அடினோகார்சினோமா’ எனப்படுகிறது. அகற்றப்பட்ட திசுக்கள் குறித்து அடுத்துவரும் நாள்களில் கூடுதல் பரிசோதனைகள் மேற்கொள்ளப்பட உள்ளன. அறுவை சிகிச்சைக்கு முன்னர் நடத்தப்பட்ட பரிசோதனைகள், பாதிக்கப்பட்ட பகுதியின் அமைவிடம் மற்றும் மேற்கொள்ள வேண்டிய சிகிச்சை முறை குறித்து மருத்துவக் குழுவிற்கு ஏற்கெனவே தேவையான தகவல்களை வழங்கியிருந்தன.
திருப்பீடச் செய்தித் தொடர்பகத்தின் தகவலின்படி, திருத்தந்தை சுமார் மூன்று மணி நேரம் அறுவை சிகிச்சைப் பிரிவில் இருந்தார். அறுவை சிகிச்சை மட்டும் ஏறத்தாழ 90 நிமிடங்கள் நடைபெற்றது. சிகிச்சையின்போது எந்தவிதமான சிக்கல்களும் ஏற்படவில்லை. அறுவை சிகிச்சைக்குப் பின்னர் சிறிது நேரம் மருத்துவக் கண்காணிப்பில் வைக்கப்பட்ட திருத்தந்தை, இயல்பாக விழித்தெழுந்து, மருத்துவமனையின் பத்தாவது மாடியில் உள்ள தனது அறைக்குத் திரும்பினார்.
இந்த அறுவை சிகிச்சையில் பேராசிரியர் எலிசா மேயாச்சி, மருத்துவர் மரியா தெரேசா கொண்டேடோ மற்றும் மருத்துவர் லியோனார்டோ பெட்ராக்கா சியவாரெல்லா ஆகியோர் பேராசிரியர் மார்கரிட்டோராவுடன் இணைந்து பணியாற்றினர். மயக்க மருந்து வழங்கும் மருத்துவக் குழுவிற்கு பேராசிரியர் மாசிமோ அந்தோனெல்லி தலைமையேற்றார். அவருடன் மருத்துவர் ஜியோவான்னி புன்சோ மற்றும் மருத்துவர் ஜூசெப்பே பெல்லோ ஆகியோர் பணியாற்றினர்.
அறுவை சிகிச்சைக்குப் பின்னர், திருத்தந்தை இரவு உணவைக் கேட்டுப் பெற்றுக்கொண்டதாகவும், தமது செயலாளர்கள் மற்றும் வத்திக்கான் பணியாளர்களுடன் மாலைப் பொழுதைக் கழித்ததாகவும் திருப்பீடச் செய்தித் தொடர்பகத்தின் இயக்குநர் மாத்தேயோ புரூனி தெரிவித்தார்.
திருத்தந்தை மருத்துவமனையில் ஏறத்தாழ ஒரு வாரம் தங்கியிருந்து சிகிச்சை மற்றும் மருத்துவக் கண்காணிப்பைப் பெறுவார் என்று முன்னதாகத் தெரிவிக்கப்பட்டிருந்தது. இந்தத் திட்டத்தில் இதுவரை எந்த மாற்றமும் அறிவிக்கப்படவில்லை. திருத்தந்தையின் உடல்நலத்திற்காக உலகெங்கிலும் உள்ள கத்தோலிக்கர்கள் தொடர்ந்து இறைவேண்டலில் ஒன்றிணையுமாறு அழைப்பு விடுக்கப்பட்டுள்ளது.
Daily Program
