அமைதி வேண்டி 6 நாடுகளின் தலைவர்களுக்குத் தந்தி | Veritas Tamil

பெரு நாட்டிலிருந்து உரோம் திரும்பியபோது, நவம்பர் 16 மற்றும் 17 ஆகிய நாள்களில், தாம் பயணித்த விமானம் கடந்து சென்ற ஆறு நாடுகளின் தலைவர்களுக்கு திருத்தந்தை பதினான்காம் லியோ அவர்கள் தந்திகளை அனுப்பி, அமைதி, ஒற்றுமை மற்றும் நல்லிணக்கத்திற்காக இறைவேண்டல் செய்தார். உருகுவே, அர்ஜென்டினா, பெரு ஆகிய நாடுகளுக்குத் தாம் மேற்கொண்ட திருத்தூதுப் பயணத்தின் நிறைவில் இந்தத் தந்திகள் அனுப்பப்பட்டன.

பெரு நாட்டின் அரசுத்தலைவர் கெய்கோ ஃபுஜிமோரிக்கு அனுப்பிய செய்தியில், தமக்கு அன்பான வரவேற்பையும் தாராளமான விருந்தோம்பலையும் வழங்கிய அவருக்கும் பெரு நாட்டு மக்களுக்கும் திருத்தந்தை நன்றியைத் தெரிவித்தார்.

பெரு நாடு தமது இதயத்திற்கு நெருக்கமான நாடு என்று குறிப்பிட்ட அவர், அந்நாட்டு மக்களுக்காகத் தொடர்ந்து இறைவேண்டல் செய்வதாகவும், எல்லாம் வல்ல இறைவனின் நிறைவான ஆசி அவர்களுக்குக் கிடைக்க வேண்டுவதாகவும் தெரிவித்தார்.

பிரேசில் வான்வெளியைக் கடந்து சென்றபோது, அந்நாட்டின் அரசுத்தலைவர் லூயிஸ் இனாசியோ லூலா டா சில்வா அவர்களுக்கும் மக்களுக்கும் வாழ்த்துகளைத் தெரிவித்து, இறையாசீர் வேண்டினார்.

பிரெஞ்சு கயானா வான்வெளியைக் கடந்தபோது, பிரான்ஸ் அரசுத்தலைவர் இம்மானுவேல் மக்ரோனுக்கும் பிரெஞ்சு மக்களுக்கும் வாழ்த்துகளை அனுப்பிய திருத்தந்தை, அந்நாட்டு மக்கள் அமைதி, வளம், நல்லிணக்கம் ஆகியவற்றைப் பெற இறைவேண்டல் செய்தார்.

மொராக்கோ மன்னர் ஆறாம் முகம்மது அவர்களுக்கும் அந்நாட்டு மக்களுக்கும் வாழ்த்துகளைத் தெரிவித்து, ஒற்றுமையும் அமைதியும் நிலவ இறைவனின் ஆசியை வேண்டினார்.

ஸ்பெயின் வான்வெளியைக் கடந்தபோது, மன்னர் ஆறாம் ஃபெலிப்பே அவர்களுக்கும் ஸ்பெயின் மக்களுக்கும் வாழ்த்துகளைத் தெரிவித்ததுடன், தமது அண்மைய பயணத்தையும் நன்றியுடன் நினைவுகூர்ந்தார்.

இறுதியாக, இத்தாலி அரசுத்தலைவர் செர்ஜியோ மட்டரெல்லா அவர்களுக்கு அனுப்பிய தந்தியில், உருகுவே, அர்ஜென்டினா, பெரு ஆகிய நாடுகளின் உள்ளூர் திருஅவைகளின் உயிரோட்டமான செயல்பாடுகளைத் தாம் கண்டு வியந்ததாகக் குறிப்பிட்டார்.

இறைநம்பிக்கையாலும் புனிதர்களின் சாட்சிய வாழ்வாலும் வலுப்பெற்ற அந்தத் திருஅவைகள், மகிழ்ச்சி மற்றும் நம்பிக்கையின் நற்செய்தியை வாழ்வில் வெளிப்படுத்தும் சாட்சிகளாகத் திகழ்வதாகத் தெரிவித்தார். மேலும், இத்தாலி நாட்டிற்காகத் தாம் தொடர்ந்து இறைவேண்டல் செய்வதாகவும் உறுதியளித்தார்.

Tamil Survey Popup Image