ஆசியாவில் கத்தோலிக்க தலைமையிலான எரிசக்தி மாற்றத்தை ஊக்குவிக்க RVA, பிலிப்பைன்ஸ் காலநிலை குழு
ஆசியாவில் கத்தோலிக்க தலைமையிலான எரிசக்தி மாற்றத்தை ஊக்குவிக்க RVA, பிலிப்பைன்ஸ் காலநிலை குழுஃபிலிப்பைன்ஸ் தட்பவெப்பநிலை நீதிக்கான இயக்கம் (PMCJ), ‘ரேடியோ வெரிதாஸ் ஆசியா’ அமைப்புடன் இணைந்து, ஆசிய-பசிபிக் பிராந்தியம் முழுவதும் புதுப்பிக்கத்தக்க ஆற்றல் மற்றும் ஆற்றல் மாற்றத்திற்கான ஆன்மீக ரீதியிலான அணுகுமுறையை ஊக்குவிக்கும் வகையில், செப்டம்பர் 23, 2026 அன்று ஒரு பிராந்திய இணையவழி கருத்தரங்கை (Webinar) நடத்தவுள்ளது.
“நமது பொதுவான இல்லத்திற்கான ஒளி: ஆசிய-பசிபிக் பகுதியில் கத்தோலிக்க தலைமைத்துவத்துடனான புதுப்பிக்கத்தக்க ஆற்றல் மாற்றத்தை விரைவுபடுத்துதல்” என்ற தலைப்பில் நடைபெறும் இந்த இணையவழி கருத்தரங்கு, ஒரு புதிய திட்டத்தின் தொடக்க நிகழ்வாக அமையும். 'லாவ்தாதோ சி' (Laudato Si’) கோட்பாட்டின் வழிகாட்டுதலோடு, ஃபிலிப்பைன்ஸ் மற்றும் இந்தோனேசியாவில் உள்ள கத்தோலிக்க சமூகங்கள் தங்களுக்கு ஏற்ற புதுப்பிக்கத்தக்க ஆற்றல் மாற்றத் திட்டங்களை உருவாக்க உதவுவதே இத்திட்டத்தின் முக்கிய நோக்கமாகும்.
ஒவ்வொரு ஆண்டும் செப்டம்பர் 1 முதல் அக்டோபர் 4 வரை கடைப்பிடிக்கப்படும் 'படைப்பின் காலம்' (Season of Creation) கொண்டாட்டத்தின் போது இந்த 90 நிமிட பிராந்திய கருத்தரங்கு நடைபெறுகிறது. இதில் ஆசிய-பசிபிக் பிராந்தியத்தைச் சேர்ந்த கத்தோலிக்க தலைவர்கள், லாவ்தாதோ சி அனிமேட்டர்கள், ஆன்மீக அமைப்புகள், கல்வியாளர்கள், காலநிலை ஆர்வலர்கள் மற்றும் பிற பங்கேற்பாளர்கள் ஒன்றாக இணையவுள்ளனர்.
இக்கருத்தரங்கு பங்கேற்பாளர்களுக்கு புதுப்பிக்கத்தக்க ஆற்றல் மற்றும் ஆற்றல் மாற்றத் திட்டமிடல் குறித்த ஆன்மீக அடிப்படையிலான அறிமுகத்தை வழங்குவதோடு, ஃபிலிப்பைன்ஸ், இந்தோனேசியா மற்றும் ஆசிய-பசிபிக் பிராந்தியத்தின் பிற பகுதிகளில் மேற்கொள்ளப்பட்டு வரும் நடைமுறைச் சாத்தியமான சமூக அளவிலான முயற்சிகளையும் எடுத்துக்காட்டும்.
மேலும், கத்தோலிக்க சமூகங்கள் தங்கள் அனுபவங்களைப் பகிர்ந்து கொள்ளவும், ஒருவரிடமிருந்து ஒருவர் கற்றுக்கொள்ளவும், புதுப்பிக்கத்தக்க ஆற்றல் மற்றும் சுற்றுச்சூழல் சார்ந்த நடவடிக்கைகளில் இணைந்து செயல்படவும் இது உதவும். கத்தோலிக்க மற்றும் பிற மதக் குழுக்களுக்கு இடையே ஆசிய-பசிபிக் பிராந்தியம் முழுவதும் ஒத்துழைப்பை ஊக்குவிக்கவும் இது வழிவகுக்கும்.
'லாவ்தாதோ சி' பார்வையின் மூலம் புதுப்பிக்கத்தக்க ஆற்றல் மாற்றத்தைப் புரிந்து கொள்ளவும், நடைமுறை அனுபவங்களிலிருந்து கற்றுக்கொள்ளவும், விரைவில் வெளிவரவிருக்கும் புதுப்பிக்கத்தக்க ஆற்றல் மாற்றத்திற்கான வழிகாட்டி மற்றும் பிராந்திய ஆன்மீகப் பிரச்சாரத்தை ஆராயவும் பங்கேற்பாளர்களுக்கு உதவுவதே இதன் நோக்கமாகும்.
பங்கேற்பாளர்கள் தங்களது பங்களிப்பாக, தங்கள் சமூகங்களில் உள்ள பங்குகள் (Parish) மற்றும் பள்ளி அளவிலான புதுப்பிக்கத்தக்க ஆற்றல் மாற்றத் திட்டங்களை உருவாக்க ஊக்குவிக்கப்படுவார்கள்.
ஃபிலிப்பைன்ஸ் தட்பவெப்பநிலை நீதிக்கான இயக்கத்தின் (ஆசிய-பசிபிக்) தேசிய ஒருங்கிணைப்பாளர் இயன் ரிவேரா (Ian Rivera), பிராந்தியத் தரவுகள், கொள்கை வளர்ச்சிகள் மற்றும் சமூக அளவிலான ஆற்றல் மாற்ற முயற்சிகள் குறித்து உரையாற்றுவார்.
இந்தியாவைச் சேர்ந்த சகோதரி ஐடா ஃபெராவ் (Sr. Ida Ferrao), சுற்றுச்சூழல் மாற்றம் மற்றும் புதுப்பிக்கத்தக்க ஆற்றல் நடவடிக்கைகளில் ஆன்மீகச் சமூகங்களின் அனுபவங்களைப் பகிர்ந்து கொள்வார்.
இந்த இணையவழி கருத்தரங்கு செப்டம்பர் 23 அன்று மணிலா நேரப்படி மாலை 5 மணிக்கு நடைபெற திட்டமிடப்பட்டுள்ளது. இது ஜகார்த்தா நேரப்படி மாலை 4 மணிக்கும், சியோல் நேரப்படி மாலை 6 மணிக்கும், சிட்னி நேரப்படி இரவு 7 மணிக்கும், ஆக்லாந்து நேரப்படி இரவு 9 மணிக்கும் சமமானதாகும்.
ஆசிய-பசிபிக் பிராந்தியம் முழுவதிலும் உள்ள கத்தோலிக்க சமூகங்களை தூய்மையான மற்றும் நிலையான ஆற்றல் எதிர்காலத்தை நோக்கி உறுதியான நடவடிக்கைகளை எடுக்கத் தொடர்ந்து ஊக்குவிக்கும் வகையில், மே 2027 இல் நடைபெறும் 'லாவ்தாதோ சி' வாரத்தின் போது இரண்டாவது பிராந்திய இணையவழி கருத்தரங்கு நடத்தத் திட்டமிடப்பட்டுள்ளது.
Daily Program
